Краіны G7 асудзілі саўдзел Мінска ў вайне супраць Украіны
Сцягі краін Вялікай сямёркі / usembassy.gov
Тэму Беларусі ўздымалі на штогадовым саміце Вялікай сямёркі, які праходзіць у італьянскім Брындызі 13-15 чэрвеня, паведамляе "Позірк".
Краіны G7 асудзілі саўдзел афіцыйнага Мінска ў вайне Расіі супраць Украіны. Таксама лідары краін Вялікай сямёркі выказалі занепакоенасць рэпрэсіямі, якія рэжым Лукашэнкі праводзіць супраць незалежных СМІ, грамадзянскай супольнасці, апазіцыі і грамадзян, якія мірна выказваюць сваё меркаванне. Яны заклікалі афіцыйны Мінск неадкладна і без умоваў вызваліць палітвязняў.
Нагадаем, што падчас сустрэчы на Капры (Італія) 19 красавіка міністры замежных спраў краін Вялікай сямёркі таксама згадалі Беларусь. Яны асудзілі саўдзел рэжыму Лукашэнкі ў расійскай агрэсіі супраць Украіны. А ў выніковай заяве згадалі Беларусь у сувязі з размяшчэннем расійская ядзернай зброі на тэрыторыі краіны.
У 2024 годзе ў G7 старшынюе Італія. У аб'яднанне ўваходзяць таксама Вялікабрытанія, Германія, Канада, ЗША, Францыя і Японія.
