Крысціна Ціманоўская заняла другое месца на чэмпіянаце ў Польшчы

Беларуская лёгкаатлетка Крысціна Ціманоўская заняла другое месца на чэмпіянаце ў Польшчы. Яна прабегла дыстанцыю 60 метраў за 7,25 секунды.

У той жа дзень у Беларусі таксама праходзіў чэмпіянат. Найлепшы вынік у забегу на 60 метраў сярод жанчын, які там паказалі, — 7,43 секунды.

Крысціне Ціманоўскай прыйшлося з'ехаць у Польшчу проста з Алімпіяды ў Токіа ў 2021 годзе. Трэнерскі штаб нечакана вырашыў паставіць бягуху на эстафету 4 * 400 метраў. Але Ціманоўская бегае толькі кароткія дыстанцыі на 100 і 200 метраў.

Дзяўчына выклала ў сацсетку відэа, дзе вельмі абуралася такім рашэннем. Пасля яе хацелі датэрмінова адправіць дадому. Ціманоўскай ва ўльтыматыўнай форме сказалі збіраць рэчы і ехаць у аэрапорт. Там спартсменка звярнулася за дапамогай да паліцыі.

У чэрвені 2022 года Крысціна Ціманоўская атрымала польскае грамадзянства.