Латвія падоўжыла рэжым надзвычайнай сітуацыі на мяжы з Беларуссю
Латвійска-беларуская мяжа / Wikipedia.org
На латвійска-беларускай мяжы падоўжаны рэжым надзвычайнай сітуацыі, паведамляе прэс-служба кабміна Латвіі.
Рэжым будзе дзейнічаць да 10 лютага 2023 года ў чатырох памежных самакіраваннях Латвіі — Лудзенскім, Краслаўскім, Аўгшдаўгаўскім краях і Даўгаўпілсе. Гэты рэжым быў уведзены з улікам праблемы з нелегальнымі мігрантамі на мяжы з Беларуссю ў жніўні.
"У кампетэнтныя органы Літвы і Польшчы таксама працягваюць паступаць звесткі аб спробах незаконнага перасячэння мяжы з боку Беларусі. Такім чынам, у далейшым неабходна забяспечыць ахову латвійска-беларускай мяжы ва ўзмоцненым рэжыме", — заявілі ва ўрадзе.
Як паведамляла Еўрарадыё, урад абвясціў надзвычайную сітуацыю з 11 жніўня да 10 лістапада ў жніўні 2021 года і з тых часоў яе некалькі разоў падаўжаў.
Памежная служба краіны ў жніўні не пусціла ў Латвію 301 чалавека, у верасні — 299 чалавек, у кастрычніку — 173 чалавекі. А з 10 жніўня 2021 года было спыненае незаконнае перасячэнне латвійскай мяжы 7562 асобамі.
