Лідар маладафронтаўцаў беспакарана назваў Лукашэнку "г…ком" (дакумент)

04/01/2019 - 16:04

Міліцыя не пабачыла абразы кіраўніка дзяржавы ў выказванні абаронцы Курапатаў Дзяніса Урбановіча: "Гэта наш знак пратэсту супраць незаконнай улады г...ка Лукашэнкі".

Пра гэта кіраўніку "Маладога фронту" паведамілі ў афіцыйных лістах з РУУС Мінскага раёна і Бараўлянскага аддзела міліцыі.

Сам інцыдэнт адбыўся ў ліпені 2018 года. Хлопец кажа, што ён нёс варту каля рэстарана "Поедем поедим", пабудаванага насупраць Курапатаў. Там ён пасварыўся з дзвюма нецвярозымі дзяўчынамі, якія здымалі канфлікт на відэа. "Яны казалі, што Лукашэнка хутка з намі ўсімі разбярэцца. Тады я троху на эмоцыях вось так выказаўся пра нашага прэзідэнта. Хвілін праз пяць пасля гэтага да мяне падышлі супрацоўнікі міліцыі", — згадвае Урбановіч.

Міліцыя правяла экпертызу яго выказвання, аднак крымінальную справу за абразу кіраўніка дзяржавы на хлопца так і не пачалі. Эксперты прыйшлі да высновы: хоць выказванне і негатыўна ацэньвае Аляксандра Лукашэнку, але законных падстаў лічыць яго абразай няма.

"Выказаныя Урбановічам Д. І. лексемы характарызуюцца негатыўнай ацэнкай, але ніякім чынам не аднесеныя да катэгорыі абразы, з улікам таго, што згаданая катэгорыя злачынства здзяйсняецца выключна з прамым намерам, накіраваным на знарочыстае прыніжэнне гонару і годнасці кіраўніка дзяржавы ў прысутнасці пабочнай асобы", — гаворыцца ў дакуменце.