Лукашэнка правёў тэст Tesla і параўнаў з беларускай Geely
31 жніўня на тэрыторыі Палаца Незалежнасці Аляксандр Лукашэнка правёў тэст апошняй мадэлі электрамабіля Tesla. Ён даручыў распрацоўшчыкам беларускага электрамабіля імкнуцца да гэтага ўзроўню.
На нарадзе, прысвечанай беларускаму аўтамабілебудаванню, прысутнічалі памочнік прэзідэнта Аляксандр Косінец, міністр прамысловасці Віталь Воўк, старшыня прэзідыума НАН Уладзімір Гусакоў, а таксама распрацоўшчыкі айчынных электрамабіляў.
Лукашэнка падкрэсліў, што сёння ва ўсім свеце развіваецца вытворчасць электрамабіляў. Апробаваўшы электрамабіль Tesla, кіраўнік дзяржавы высока ацаніў яго тэхнічныя характарыстыкі і дынаміку.
"Хуткасць набірае, што ўсе нашы нямецкія тэставаныя аўтамабілі на рухавіках унутранага згарання засталіся імгненна ззаду і дагнаць не змаглі. Стартуе ён, як касмічны карабель, і яшчэ больш магутны. За дзве з паловай секунды — 100 км. Але мяне цікавіла, як ён трымае дарогу, — ідэальна", — перадае прэс-служба словы Лукашэнкі. Ён параіў беларускім распрацоўшчыкам выкарыстоўваць гэтае аўто ў якасці ўзору, да якога неабходна імкнуцца.
Беларускі кіраўнік паведаміў, што падрабязна азнаёміўся з нядаўна створаным беларускім электракарам на базе Geely. Па яго словах, аўтамабіль выглядае "вонкава прыстойна".
Як паведамлялася раней, 22 жніўня распрацоўшчыкі з Нацыянальнай акадэміі навук прадставілі беларускі электракар, зроблены на аснове Geely. Машыну апробаваў віцэ-прэм'ер Уладзімір Сямашка.
Лукашэнка падкрэсліў, што абяцанні распрацоўшчыкаў яго натхняюць і насцярожваюць адначасова. "Калі мы можам стварыць і батарэю — назапашвальнік электраэнергіі — найлепшую ў свеце, чаму мы не ствараем? Што для гэтага трэба? Людзі, грошы, кампетэнцыі? Неадкладна трэба гэта рэалізоўваць", — заявіў ён.
Таксама Лукашэнка даў канструктарам практычныя рэкамендацыі, зыходзячы са знаёмства з электрамабілем Tesla. "Батарэя — адзін з асноўных элементаў. Не трэба яе засоўваць у багажнік. Як вы ўбачылі, яе паклалі на дно ў Tesla, і яна, як я зразумеў, нават ўтрымлівае на высокай хуткасці аўтамабіль, балансуе рух. Таму і нам гэтым шляхам трэба пайсці", — выказаў ён сваё меркаванне.
Кіраўнік Беларусі прызнаўся, што цікавіцца навінкамі сусветнага аўтапрама, у тым ліку электракарамі: "Я ведаю, Mitsubishi стварылі ў свой час. Горай, можа быць. Потым BMW — добры, вельмі вёрткі, хуткі, меншых памераў. І вось трэці аўтамабіль, які мне даводзіцца тэставаць. Я вам раскрываю ўсе асабістыя карты: з даўніх часоў аўтамабілі — гэта маё хобі, я сачу за развіццём гэтай галіны".
Лукашэнка падкрэсліў, што ў Беларусі трэба развіваць і іншыя віды электрычнага транспарту, у тым ліку ровары, матацыклы і скутары.
