Лукашэнка расказаў аб продажы на мяса туш з жывёльнага могільніка
Цяляты, ілюстрацыйнае фота / pixabay.com
У Мінскай вобласці на мяса прадавалі тушы з жывёльнага могільніка. Пра гэта заявіў на нарадзе 16 красавіка Аляксандр Лукашэнка, перадае яго прэс-служба.
Ён заявіў, што кожнае пятае злачынства ў сферы барацьбы з карупцыяй і эканамічнай злачыннасцю летась закранала сельскую гаспадарку. Таксама ён паведаміў пра прыпіскі амаль дзвюх тысяч галоў жывёлы — такія факты фіксуюцца ва ўсіх абласцях краіны.
Акрамя таго Лукашэнка расказаў, як у Мінскай вобласці на мяса прадавалі тушы з жывёльнага могільніка: "Не ведаю нават, як назваць гэтых людзей. Дайшлі да таго, што даставалі з жывёльных могільнікаў тушы паўшай буйной рагатай жывёлы, раскрыжоўвалі іх і прадавалі на мяса насельніцтву. Прычым гэтым святатацтвам займаліся і ветэрынарныя дактары, і брыгадзіры сельгасарганізацый трох раёнаў Мінскай вобласці — Любанскага, Асіповіцкага і Старадарожскага".
