"Запаветы Ільіча" і "Парыжская слабада": топ калгасаў з дзіўнымі назвамі

15/04/2024 - 14:54

Калгасы з дзіўнымі назвамі / vitvesti.by

За апошнія гады большасць буйных сельскагаспадарчых вытворчасцяў у Беларусі перасталі быць калгасамі. Яны ператварыліся ў акцыянерныя таварыствы, трапляюцца і іншыя формы ўласнасці.

Але сутнасць гэтых арганізацый змянялася рэдка. Як і ў СССР, сучасныя ўжо-не-калгасы
працягваюць атрымліваць датацыі ад дзяржавы і далёка не заўсёды прыносяць прыбытак. А ў многіх з іх захаваліся старыя назвы, якія ў 2024 годзе гучаць максімальна дзіўна.

Вось наш топ такіх калгасаў.

ААТ "Радзіма Якуба Коласа"

Народны паэт Беларусі Якуб Колас нарадзіўся ў вёсцы Акінчыцы Стаўбцоўскага раёна. А вось аграрнае прадпрыемства, якое называе сябе яго радзімай, чамусьці знаходзіцца ў аграгарадку Любкаўшчына, кіламетрах у 15 ад Акінчыц, на другім беразе Нёмана. Якая ж гэта радзіма Якуба Коласа?

Само прадпрыемства вырабляе мяса і малако, а таксама вырошчвае збожжавыя культуры.

Вось так пішаш паэмы і вершы ўсё жыццё, а калгас называюць не ў твой гонар, а ў гонар радзімы, і да таго ж, гэта нават і не радзіма зусім.

КСУП "Парыжская Слабада"

Што агульнага паміж французскай сталіцай і калгасам у Касцюковічах? Як ні дзіўна, другі названы ў гонар першай.

Чаму прадпрыемства называецца менавіта так — гісторыя не расказвае. У Беларусі ёсць пасёлак Парыж з невялікай сімвалічнай Эйфелевай вежай. Але знаходзіцца ён не ў Касцюковіцкім, а ў Пастаўскім раёне — гэта значыць, вельмі і вельмі далёка ад "Парыжскай Слабады".

Дарэчы, "Парыжская Слабада" вырабляе мяса, малако і зерне. Аднак спадзяемся, што правіла "убачыць Парыж і памерці" тут не працуе.

ААТ "10 з'езд Саветаў"

Савецкую назву гэты калгас захаваў аж з 1944 года. Знаходзіцца ён у Чэрвеньскім раёне Мінскай вобласці. Займаецца тым, чым звычайна займаюцца калгасы: вытворчасцю малака, мяса, збожжа і рапсу.

Рэальны дзясяты усерасійскі з'езд Саветаў (тады яшчэ не КПСС) прайшоў у сакавіку 1922 года. Удзельнікі ад БССР былі на ім толькі ганаровымі гасцямі.

Той з'езд азнаменаваў пераход СССР да новай эканамічнай палітыкі замест ваеннага камунізму. Гэта значыць назва "10 з'езд саветаў" — наогул прагрэсіўная. Ну, была прагрэсіўнай сто гадоў таму.

КСУП "Запаветы Ільіча"

Пра якога менавіта Ільіча ідзе гаворка ў назве калгаса — невядома. Гэта можа быць як Ленін, так і Брэжнеў, улічваючы, што заснаваны калгас быў у 1969 годзе, ужо пры Леанідзе Ільічы.

Прадпрыемства пазіцыянуе сябе як рэнтабельнае, "якое вырабляе якасную і натуральную сельскагаспадарчую прадукцыю". Цудоўна, калі так яно і ёсць. Але над брэндам відавочна яшчэ варта добра падумаць.

КСУП "Чырвоная Армія"

Хоць Чырвоная армія і перастала існаваць яшчэ ў 1991 годзе, аднайменны калгас дзейнічае ў Рагачоўскім раёне да гэтай пары. У адкрытых крыніцах гаворыцца, што ў сярэднім гаспадарка рэалізоўвае 7 тысяч тон малака і 880 тон мяса на год.

А галоўныя мэты "Чырвонай Арміі" — павышэнне якасці прадукцыі, павелічэнне аб'ёмаў вытворчасці, а таксама ўкараненне новых і высокіх тэхналогій. Над укараненнем новай назвы там чамусьці не падумалі, бо яна ўжо 33 гады як састарэла.

***

Гэта далёка не поўны спіс беларускіх сельгаспрадпрыемстваў з дзіўнымі назвамі — насамрэч іх значна больш.

Паглядзіце, што яшчэ мы для вас наадбіралі:
УП "За Радзіму"
ААТ "Бальшавік-агра"
ААТ "Чырвоны партызан"
ААТ "Герой"
ПСГ "Наша Ніва"