Людзей з "прафілактычнага ўліку" выклікаюць у міліцыю на дзень "выбараў"
Выбарчыя скрыні
Людзей, якія адбылі палітычнае пакаранне і былі пастаўленыя на "прафілактычны ўлік", выклікаюць у міліцыю на дзень "выбараў", 26 студзеня. Звесткі пра гэта атрымалі праваабаронцы з "Гомельскай Вясны".
6 студзеня такіх апанентаў улады выклікалі на гутарку ў адно з раённых аддзяленняў міліцыі (дзеля бяспекі праваабаронцы не называюць канкрэтнае РАУС, дзе гэты факт адбыўся). Супрацоўнік крымінальна-выканаўчай інспекцыі некалькі гадзін расказваў пра шчаслівае жыццё ў Беларусі і перасцерагаў ад учынкаў, якія могуць не спадабацца ўладзе. Наступную гутарку ён прызначыў на 26 студзеня.
Некаторыя з прысутных сказалі, што ў гэты дзень адбудуцца "выбары", на якія трэба схадзіць прагаласаваць. У адказ пачылі наступнае: "Ну, паспрабуйце схадзіць прагаласаваць — паглядзім, чым гэта для вас закончыцца. Вы сваё ўжо адгаласавалі ў 20-м годзе!"
Незалежныя назіральнікі адзначаюць, што "выбары", прызначаныя на 26 студзеня, адбываюцца ва ўмовах працяглых жорсткіх палітычных рэпрэсій. У Беларусі ліквідаваныя ўсе апазіцыйныя палітычныя партыі, а любая крытыка ўлады фактычна пагражае крымінальным пераследам.
