“Людзі з усё той жа калоды”. Фрыдман пра новыя прызначэнні Лукашэнкі

27/06/2024 - 17:23

Новыя прызначэнні / president.gov.by

— Пэўныя прызначэнні былі чаканымі, — каментуе Еўрарадыё сённяшняе “ператрахванне” кадраў палітычны аглядальнік Аляксандр Фрыдман. — Тое, што аднойчы Лукашэнка прызначыць кіраўніка сваёй адміністрацыі, было зразумела, і Дзмітрый Крутой быў адным з тых, хто разглядаўся ў якасці магчымага кандыдата.

Пэўная сенсацыйнасць ёсць у вяртанні Наталлі Пяткевіч, якая стала першай намесніцай кіраўніка адміністрацыі. Але гэтым Лукашэнка яшчэ раз паказаў, што кадры, якімі ён быў задаволены ў мінулым, могуць вярнуцца на высокую пасаду.

Нават калі гэтага ніхто не чакае.

Больш за ўсё Аляксандра Фрыдмана здзівіла адстаўка міністра замежных спраў Сяргея Алейніка, якога змяніў на пасадзе Максім Рыжанкоў. Паводле эксперта, нічога не прадказвала, што Алейніка так проста здымуць. Праца вялася, дыпламат прысутнічаў на нядаўняй сустрэчы Лукашэнкі і Сяргея Лаўрова.

— Чаму на гэтай пасадзе спатрэбіўся менавіта Рыжанкоў і чаго ад яго чакаць?

— Гэта свой чалавек, які мае пэўны дыпламатычны досвед, але ён не ідзе ні ў якае параўнанне з досведам Алейніка. Напрыклад, Алейнік шмат працаваў на Захадзе, і ў дыпламатычным сэнсе ён нашмат большы прафесіянал.

Калі Алейнік знаходзіўся на пасадзе, у яго не было поспехаў на заходнім напрамку. Але іх у сённяшняй сітуацыі ў прынцыпе не магло быць. З іншага боку, ён рыхтаваў розныя візіты для Лукашэнкі. Нельга казаць, што Алейнік працаваў настолькі кепска, што яго трэба было тэрмінова звальняць.

Таму, думаю, тут рэч не столькі ў Рыжанкове, колькі ў Алейніку. Чамусьці спатрэбілася Лукашэнку хутка пазбавіцца ад Алейніка, і ён шукаў чалавека на гэтую пасаду, які мае пэўную вагу.

Міністр замежных спраў — гэта, вядома, у беларускім кантэксце тэхнічная фігура. Але раптам новы чалавек зможа зрабіць нейкія прарывы на заходнім кірунку? Хаця гэта мне падаецца вельмі сумнеўным. Я думаю, што найбліжэйшым часам высветліцца, чаму ад Алейніка вырашылі так хутка пазбавіцца і замяніць яго на Рыжанкова.

— Ці можна чакаць, што Рыжанкоў наладзіць кантакт з Захадам?

— Мне падаецца, што не, бо Алейнік у гэтым сэнсе быў нашмат лепш падрыхтаваны. Ён быў амбасадарам у заходніх краінах, ён ведае Захад.

На ўсходнім ці афрыканскім кірунку Алейніку было некамфортна, і там ён выглядаў не вельмі ўпэўнена. Відавочна, што гэта проста не ягоны свет. Алейніка прызначалі, каб палепшыць стасункі з Захадам, выкарыстаўшы яго заходнія кампетэнцыі. Але не атрымалася.

Магчыма, Рыжанкоў увогуле будзе арыентавацца не на заходні, а перш за ўсё на ўсходні вектар развіцця. Тое, што цяпер пазбаўляюцца ад Алейніка, можа сведчыць, што Лукашэнка больш не спадзяецца на паляпшэнне стасункаў з Захадам.

— Чым заслужыў сваю пасаду Дзмітрый Крутой?

— Ён заўсёды паказваў сваю лаяльнасць Лукашэнку. Гэты чалавек дастаткова дасведчаны, мае адпаведную адукацыю. Галоўнае — гэта лаяльнасць, а яшчэ ім вельмі задаволеныя ў Расіі.

Крутой — гэта чалавек, які можа працаваць з Расіяй, дасведчаны ў наменклатурнай галіне, мае эканамічную падрыхтоўку, малады і адданы Лукашэнку. То-бок на гэты момант ён — ідэальны кіраўнік эпохі Лукашэнкі. Мае досвед працы ва ўрадзе, быў намеснікам у адміністрацыі...

Відавочна, што з пункту гледжання Лукашэнкі ён заслугоўвае павышэння, таму яго скіравалі на гэтую пасаду. Цікава, што гэта цягнулася так доўга. Лукашэнка мог яго прызначыць і раней. Магчыма, першапачаткова разглядаўся Рыжанкоў. Але там нешта адбылося ў сувязі з Алейнікам, таму Рыжанкова прызначылі міністрам. Але і кіраўнік адміністрацыі патрэбны, таму ім стаў Крутой.

— Навошта “дасталі з шафы” Наталлю Пяткевіч?

— Наталля Пяткевіч таксама даказала сваю лаяльнасць. Яна шмат гадоў у розныя часы працавала побач з Лукашэнкам. Ён ведае яе і думае, што на чацвёртым дзясятку панавання ў Беларусі менавіта такія кадры зноў будуць запатрабаваныя. Ён ёй давярае. Тут пэўную ролю граюць асабістая лаяльнасць і пэўная кампетэнцыя.

Не трэба забываць і пра кадравы голад, які ёсць у Беларусі. Тая калода, з якой Лукашэнка выбірае, невялікая. Тым больш калі шукаць такіх лаяльных, як Крутой і Пяткевіч. Яны лаяльныя яму дзесяцігоддзі. Ім можна давяраць, яны выпрабаваныя. З астатнімі, якія новыя, цяжкавата.

— Як паўплываюць новыя прызначэнні на агульную палітыку?

— Я не думаю, што нешта прынцыпова зменіцца. Гэта не новыя асобы і гэта не тыя людзі, якія робяць акцэнты. Усё гэта выканаўцы і прыстасаванцы. Яны будуць рабіць тое, што Лукашэнка палічыць патрэбным. Так што нейкіх кардынальных зменаў я не чакаю. Гэта ж не тое, што прыйшлі людзі, якія не ўдзельнічалі ў падзеях 2020 года, не ўдзельнічалі ў рэпрэсіях. Не. Гэта людзі з усё той жа калоды, якіх сёння выцягнулі на паверхню. Так што ранейшы курс будзе працягвацца.