Мікалая Дзядка, які толькі выпісаўся з бальніцы, асудзілі на 10 сутак арышту
29 сакавіка Партызанскі суд Мінска асудзіў на 10 сутак арышту былога палітвязня Мікалая Дзядка (рашэнне вынес суддзя Неўмяржыцкі). Дзядка затрымалі падчас разгону вулічнай акцыі на Дзень Волі і жорстка збілі ў міліцэйскім аўтобусе (ён кажа, што білі кулакамі па галаве). З чэрапна-мазгавой і іншымі траўмамі яго шпіталізавалі ў бальніцу хуткай меддапамогі. Там Мікалая Дзядка вартавалі міліцыянеры. У сераду, адразу пасля выпіскі з бальніцы, яго завезлі ў Партызанскі РУУС, а адтуль — у суд.
Як паведамляе сайт spring96.org, суддзя не задаволіў хадайніцтва аб вызваленні Дзядка, паколькі прайшло больш за 96 гадзін пасля яго затрымання. Высветлілася, што ў справе аб удзеле ў несанкцыянаванай акцыі з’явіўся яшчэ адзін пратакол, пра сённяшняе затрыманне Мікалая ў 12.30 на вуліцы Кіжаватава! Але ў гэты час ён ехаў з бальніцы ў міліцыю. Суддзю, аднак, гэта не цікавіла, як і разыходжанні ў паказаннях сведак.
Радыё Свабода дадае, што ў прызначаны судом тэрмін не ўваходзяць 4 дні, якія Мікалай Дзядок быў фактычна пад вартай у бальніцы.
