МУС адказала на петыцыю супраць гамафобнай заявы

Міністэрства ўнутраных спраў адказала на петыцыю, якую падалі грамадзяне Беларусі, абураныя гамафобнай заявай на сайце МУС. 

Як вядома, 20 траўня на сайце МУС з'явўся артыкул, у якім асуджалася вывешванне вясёлкавага сцяга ЛГБТ на амбасадзе Вялікабрытаніі. Сцяг быў вывешаны ў Міжнародны дзень барацьбы з гамафобіяй. 

Пасля афіцыйнай заявы выйшла таксама інтэрв'ю з міністрам унутраных спраў Ігарам Шуневічам, які заявіў, што вывешванне сцяга на брытанскай амбасадзе з'яўляецца ўнутранай справай Беларусі. Ён асудзіў гэтую акцыю як прапаганду "таго ладу жыцця, які нам непрымальны".

У петыцыі на сайце petitions.by, якую падпісалі 1830 чалавек, прасілі праверыць законнасць выказванняў на сайце МУС. Падпісанты нагадвалі, што міліцыя абавязаная ахоўваць усіх грамадзян — незалежна ад іх грамадзянства, полу, узросту і г.д.

У адказе за подпісам начальніка ўпраўлення Г.Еўчара пацвярджаецца, што згодна з законам міліцыя абараня ад супрацьпраўных замахаў усіх грамадзян. 

Разам з тым у адказе гаворыцца: "Пазіцыя ведамства па пытаннях, якія вас цікавяць, адлюстраваная ў інтэрв'ю міністра ўнутраных спраў Рэспублікі Беларусь генерал-лейтэнанта міліцыі Шуневіча І.А.". Гаворка ідзе пра тое самае інтэрв'ю, у якім міністр заяўляе пра слушнасць гамафобнай заявы.