МУС назвала штурм Майдана "мерапрыемствамі па добраўпарадкаванні тэрыторыі"
МУС заяўляе, што гэтыя "мерапрыемствы" ажыццяўляліся ўначы, каб не ствараць дадатковых нязручнасцяў жыхарам украінскай сталіцы.
Пра гэта агенцтву УНІАН паведамілі ва Упраўленні сувязяў з грамадскасцю МУС Украіны. Пры гэтым МУС афіцыйна заяўляе, што работнікі міліцыі і вайскоўцы ўнутраных войскаў падчас падзей на Майдане Незалежнасці не ўжывалі слезацечны газ і іншыя спецсродкі супраць мітынгоўцаў.
Нагадаем, што ўначы тысячы сілавікоў атачылі Майдан і пачалі яго штурм. Супрацьстаянне працягваецца дагэтуль.
Лідары еўрапейскіх краін асудзілі сілавы разгон Еўрамайдана. А ЗША выказалі "сваю агіду наконт рашэння ўкраінскай улады адрэагаваць на мірны пратэст на кіеўскім Майдане выкарыстаннем спецназаўцаў, бульдозераў і дубінак, а не павагай да дэмакратычных правоў і чалавечай годнасці".
