МУС не праводзіць праверку па факце пагроз Святлане Ціханоўскай

МУС не праводзіць праверку пагроз на адрас прэтэндэнткі на пасаду прэзідэнта Святланы Ціханоўскай. 

"Магу паведаміць, што ў органы ўнутраных спраў зваротаў ад грамадзянкі Ціханоўскай наконт ананімных тэлефонных пагроз не паступала. І калі будзе пададзена заява непасрэдна ад яе, то, вядома, будуць праведзеныя ўсе адпаведныя праверкі ў рамках дзеючага заканадаўства", — патлумачыла парталу TUT.by прэс-сакратар МУС Вольга Чамаданава.

Паводле яе слоў, МУС не пачынае праверку без непасрэднага звароту, толькі на падставе інфармацыі ў СМІ або ў інтэрнэце. Чамаданава кажа, што Ціханоўская сама мусіць звярнуцца ў органы ўнутраных спраў. 

Між тым артыкул 166 Крымінальна-працэсуальнага кодэкса сцвярджае, што падставамі для пачатку крымінальнай справы з'яўляюцца:

заявы грамадзян;

яўка з павіннай;

паведамленне службовых асоб дзяржаўных органаў, іншых арганізацый;

паведамленне аб злачынстве ў сродках масавай інфармацыі;

непасрэднае выяўленне органам крымінальнага пераследу звестак, якія паказваюць на прыкметы злачынства.

16 чэрвеня Святлана Ціханоўская заявіла, што атрымала пагрозы на свой адрас і адрас сваіх дзяцей. Пагрозы былі звязаныя з яе дзейнасцю падчас прэзідэнцкай кампаніі. Звесткі пра гэтыя пагрозы былі апублікаваныя ў шэрагу СМІ. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.