Мытнікі знайшлі ва ўкраінкі, якая вярталася на радзіму, схаваную валюту (фота)
Беларускія мытнікі знайшлі ва ўкраінкі, якая вярталася на радзіму, схаваную валюту. Здарэнне адбылося ў пункце мытнага афармлення “Верхні Церабежаў”. Як інфармуе прэс-служба Брэсцкай мытні, 43-гадовая ўкраінка ехала ў якасці пасажыркі ў мікрааўтобусе “Mercedes-Benz”. У асабістых рэчах жанчыны знайшлі незадэклараваныя больш за 32 тысячы долараў, 8 тысяч расійскіх рублёў і 7500 украінскіх грывен. Агульная сума склала больш за 65 тысяч беларускіх рублёў. Перад гэтым яна не стала запаўняць дэкларацыю, заявіла, што не мае тавараў, якія падлягаюць дэклараванню.
У адносінах замежніцы распачалі крымінальную справу па артыкуле “кантрабанда”. Справа ў тым, што крымінальная адказнасць за перавозку праз мяжу незадэклараваных наяўных грошай прадугледжаная, калі іх памер перавышае ў эквіваленце 30 тысяч долараў ЗША.
