На Піншчыне забаранілі плаваць на маламерных судах уздоўж мяжы з Украінай
Пінскі райвыканкам забараніў маламерным судам плаваць уздоўж мяжы з Украінай. Адпаведнае рашэнне набыло моц 21 чэрвеня.
Мясцовыя ўлады забаранілі плаваць па прыгранічных рэках Ласіцкага і Хойнаўскага сельсаветаў, спасылаючыся на "ахову жыцця і здароўя насельніцтва".
Пад забарону трапіў участак Прыпяці ад месца ўпадзення ракі Простыр да ўкраінскай дзяржмяжы.
Па рацэ Простыр забаронена плаваць ад месца ўпадзення ў раку Прыпяць да мяжы з Украінай.
На рацэ Стыр забарона дзейнічае ад вёскі Востраў, уключаючы яе рысу, і да ўкраінскай дзяржмяжы.
Забарона не дзейнічае для лодак рыбалоўнага кантролю, бяспекі суднаходства, дзяржорганаў сістэмы бяспекі Беларусі. Таксама з-пад забароны выведзеныя лодкі ўстановы "Ландшафтныя заказнікі рэспубліканскага значэння "Сярэдняя Прыпяць" і "Простыр".
