На станцыі метро "Усход" тушылі загаранне цягніка

У ноч на 30 кастрычніка МНС правяло вучэнні на станцыі метро "Усход" у Мінску. Былі задзейнічаныя каля 100 ратавальнікаў і 26 адзінак тэхнікі.

Згодна з легендай вучэнняў, на станцыі загарэліся другі і трэці вагоны цягніка. Прычынай стала няспраўнасць электраабсталявання цягніка.

Было шмат дыму, а з вагонаў давялося выцягваць "пацярпелых": такіх знашлося чатыры чалавекі. Іх на насілках вынеслі на свежае паветра і перадалі медыкам.

Таксама ратавальнікі трэніраваліся ліквідоўваць пажар у падплатформеннай прасторы і арганізоўваць энергазабеспячэнне дызель-генератарамі на аб'ектах метрапалітэна.

Як расказвала Еўрарадыё, месяц таму мінскія службы МНС адпрацоўвалі на вучэннях пераход на ваенны час.