"Не трэба ехаць у Беларусь". Некалькі спосабаў легалізаваць дзяцей у Польшчы

25/08/2023 - 11:38

Дзеці / pixabay.com

Паводле апошніх звестак Міністэрства замежных спраў Польшчы, у гэтую краіну пераехалі жыць больш за 300 000 грамадзян Беларусі. У новай краіне людзям даводзіцца сутыкацца з самымі разнастайнымі праблемамі. Каб вырашыць іх без лішняй валтузні і нерваў, беларусы звяртаюцца да юрыстаў.

"Мы сутыкаемся і з разводамі, і з заключэннем шлюбаў, — расказвае кіраўніца дэпартамента прававой дапамогі Цэнтра беларускай салідарнасці Вольга Дабравольская. — Вядома, часам тут у нашых грамадзян нараджаюцца дзеці, а часта яны пераязджаюць разам з бацькамі або перабіраюцца да іх пазней. Тады ўзнікае пытанне — як жа іх легалізаваць?

Вельмі важна зразумець: няма ніякай неабходнасці выязджаць у Беларусь, каб аформіць дзіцяці дакументы. У Польшчы ўжо даўно існуюць механізмы, каб вырашыць гэтую праблему на месцы".

Какие есть способы легализации детей в Польше

Вольга Дабравольская / Еўрарадыё

Міжнародная абарона

Калі тата і мама чакаюць рашэння па міжнароднай абароне (спецыяльная працэдура па легалізацыі ў Польшчы для тых, хто абгрунтавана баіцца пераследу ў свой адрас у краіне паходжання), то дастаткова прыкласці да сваіх дакументаў пасведчанне аб нараджэнні дзіцяці — яно будзе тут жа ўключанае ў гэтую працэдуру. Якое рашэнне будзе прынятае па легалізацыі бацькоў, такое і па ім. Пасведчанне аб нараджэнні мусіць быць арыгінальным. Не турбуйцеся, вам абавязкова яго вернуць.

Калі бацькі ўжо легалізаваныя

Бывае так, што бацькі ўжо атрымалі статус бежанца ці дадатковую абарону (можа быць дадзеная замежніку, які не дапавядае ўмовам атрымання статусу бежанца, калі вяртанне ў краіну паходжання можа падвергнуць яго рэальнай небяспецы). Тады можна падаць новую заяву ад імені дзіцяці, і яго таксама легалізуюць. Часцей за ўсё гэта будзе дадатковая абарона на падставе абароны бацькоў.

Калі ў бацькоў ужо ёсць ВНЖ

Калі бацькі знаходзяцца ў Польшчы на падставе віду на жыхарства, у тым ліку на падставе віду на жыхарства па гуманітарнай візе, існуе магчымасць весці адміністрацыйную працэдуру без пашпарта, падаўшы любы іншы дакумент, які пацвярджае асобу дзіцяці.

Часам бацькі ідуць у амбасаду, бяруць даведку пра вяртанне дзіцяці ў Беларусь і на падставе гэтага легалізуюць яго ў Польшчы, не выязджаючы на радзіму.

Як наконт выдачы польскага праязнога дакумента?

Нядаўна адбыліся змены ў заканадаўстве што да выдачы польскіх праязных дакументаў (часовая замена пасведчання асобы, якая выдаецца асобам без грамадзянства і замежнікам). Напрыклад, цяпер такі дакумент можа атрымаць чалавек, у якога ніколі не было пашпарта. Вам не давядзецца даказваць, што вы не можаце вярнуцца ў Беларусь або звярнуцца ў амбасаду.

Праўда, на жаль, гэтыя змены не ідэальныя. Атрымліваецца, што спачатку трэба легалізаваць дзіця — і толькі потым можна падацца на атрыманне польскіх праязных дакументаў. Вядома, было б значна прасцей, калі б спачатку выдавалі дакумент, які пацвярджае асобу, а потым з ім можна было легалізавацца.

Калі дзіця нарадзілася ў Польшчы

Калі дзіця нарадзілася ў Польшчы, першы крок — атрымаць пасведчанне аб нараджэнні. Важна, што ў ЗАГСе дзіця аўтаматычна атрымлівае PESEL (нумар з адзінаццаці лічбаў, які ідэнтыфікуе фізічную асобу). Гэта адразу спрашчае жыццё бацькам, якім у далейшым трэба выбраць толькі спосаб легалізацыі.

Яшчэ раз падкрэслім: дзіця заўсёды можа легалізавацца на тых жа падставах, што і яго бацькі. Калі яны легалізаваныя на падставе візы — гэта можа быць ВНЖ, калі на падставе часовых ВНЖ — гэта таксама часовы ВНЖ. Калі ў аднаго з бацькоў ёсць пастаянны ВНЖ або від на знаходжанне доўгатэрміновага рэзідэнта, дзіця таксама можа прэтэндаваць на гэта.

А хіба дзіця, народжанае ў Польшчы, не атрымлівае грамадзянства аўтаматычна?

Бацькі часта пытаюць, ці можа дзіця, якое тут нарадзілася, адразу атрымаць грамадзянства ці хаця б пастаянны ВНЖ. На жаль, не. Усё робіцца толькі на падставе, па якой у Польшчы знаходзяцца бацькі.

Легалізуйце дзіця як мага раней

Юрысты просяць беларусаў пачынаць працэдуру легалізацыі дзіцяці як мага хутчэй. Пры неабходнасці вам дапамогуць аформіць пасведчанне пра тое, што магчымасць атрымаць дакумент для дзіцяці ў амбасадзе адсутнічае, бо бацькі альбо асцерагаюцца туды ісці, альбо маюць міжнародную абарону.

Не рызыкуйце

Важна разумець: калі людзі разважаюць, ці варта ехаць у Беларусь або ісці ў амбасаду, заўсёды можна падаць заяву на міжнародную абарону. Абсалютна дакладна не варта рызыкаваць сваёй свабодай дзеля дакументаў.