Нетрадыцыйная медыцына ўсё бліжэй: на беларускі рынак пусцілі БАДы з Кітаю
Кітайскія таблеткі / Pikabu
У Беларусі зацверджанае палажэнне аб дзяржаўнай рэгістрацыі біялагічных актыўных дабавак да ежы кітайскай вытворчасці. Гэтаму прысвечаная пастанова Савета міністраў №569 ад 31 жніўня 2023 года. Дакумент афіцыйна апублікаваны на Нацыянальным прававым інтэрнет-партале і набывае моц з 4 верасня.
У чэрвені 2023 года падпісаны ўказ №161, які спрашчае парадак дзяржаўнай рэгістрацыі прэпаратаў традыцыйнай кітайскай медыцыны. Цяпер Саўмін вызначыў, як гэта будзе працаваць.
Рэгістраваць БАДы з Кітая будзе Міністэрства аховы здароўя. Спрошчаная працэдура даступная для дабавак кітайскай вытворчасці, зарэгістраваных у КНР. Зацікаўленымі ў рэгістрацыі асобамі прызнаныя беларускія кампаніі — рэзідэнты індустрыяльнага парку "Вялікі камень".
Для рэгістрацыі трэба будзе прадставіць заяву, а таксама натарыяльна завераныя копію і пераклад кітайскага дакумента аб рэгістрацыі і бяспецы біялагічна актыўнай дабаўкі. БАД будзе рэгістравацца на ўвесь тэрмін дзеяння дакумента аб бяспецы, выдадзенага ў Кітаі.
