“Нічога не ведаю, званіце ў Мінкультуры”: Як працуе Дэкрэт “аб дармаедах”

“Ці існуе які-небудзь спіс творчых саюзаў, сябраў якіх вызваляюць ад выплаты падатку? Напрыклад, у Беларусі ёсць два пісьменніцкія саюзы. Дастаткова сяброўства ў любым з іх?” — пытае падчас анлайн-канферэнцыі на сайце БЕЛТА Ганна з Мінска.

Спрабуем дапамагчы ёй знайсці дакладны адказ на простае пытанне.

Валерый Кавалькоў, намеснік міністра працы і сацыяльнай абароны:

“Па дадзеных пытаннях рэкамендуем звярнуцца ў Міністэрства культуры і Міністэрства інфармацыі”.

Міністэрства культуры:

“Абодва саюзы пісьменнікаў — афіцыйна зарэгістраваныя арганізацыі. Аднак мы не можам сказаць, ці вызваленыя іх сябры ад выплаты падатку. Раім вам звярнуцца ў падатковую службу альбо да кіраўнікоў саюзаў”.

Мікалай Чаргінец, кіраўнік Саюза пісьменнікаў Беларусі:

“Я, шчыра кажучы, яшчэ не чытаў сам Дэкрэт. Толькі ў інтэрнэце бачыў. Але я думаю, што ад падатку трэба вызваліць і сябраў Саюза беларускіх пісьменнікаў, і сябраў Саюза пісьменнікаў Беларусі. Так будзе справядліва”.

Барыс Пятровіч, кіраўнік Саюза беларускіх пісьменнікаў:

“Ведаеце, мне і самому гэта цікава. Пакуль я нічога не ведаю і не магу вам адказаць. Да нас ніхто падчас стварэння тэксту Дэкрэта не звяртаўся”.

Міністэрства інфармацыі, юрыдычны аддзел:

“У нас гэтага дакумента яшчэ ніхто не бачыў, у нашы базы ён пакуль не ўключаны. Адпаведна, і дапаўненняў з тлумачэннямі да яго няма і быць не можа пакуль. Таму мы не можам вам нічога патлумачыць”.