Папу Рымскаму перадалі акрываўлены ўкраінскі сцяг, прывезены з Бучы
Папу Рымскаму Францішку перадалі акрываўлены ўкраінскі сцяг, прывезены з Бучы, украінскага горада, у якім расійскімі акупантамі былі забітыя мірныя жыхары. 6 красавіка напрыканцы агульнай аўдыенцыі ён паказаў яго. Таксама пантыфік прадставіў групу прысутных там украінскіх дзяцей, якія знайшлі прытулак у Рыме. Ён папрасіў прывітаць і памаліцца за іх, і разам з імі, паведамляе vaticannews.va.
“Апошнія навіны з Украіны замест таго, каб прынесці палёгку і надзею, сведчаць аб новых зверствах, такіх як разня ў Бучы, — гаварыў Папа Францішак. — Усё больш жахлівая жорсткасць, скіраваная таксама супраць мірных жыхароў, жанчын і безабаронных дзяцей. Яны — ахвяры, чыя нявінная кроў кліча да неба і просіць: "Пакладзіце канец гэтай вайне! Прымусьце змоўкнуць зброю! Перастаньце сеяць смерць і разбурэнне! Давайце разам маліцца за гэта!"
Папа Рымскі маліўся за ахвяр разні ў Бучы і іншых месцах Украіны.
