Пазбавілі ліцэнзіі адвакатку Сяргея Ціханоўскага
Міністр юстыцыі Сяргей Хаменка працягвае "зачыстку" / t.me/minjust_by/
Міністэрства юстыцыі Беларусі паведаміла, што "кваліфікацыйная камісія" не атэставала чатырох адвакатаў. Сцвярджаецца, што Інэса Аленская і Дзяніс Шарстнёў не могуць выконваць абавязкі абаронцаў "з прычыны недастатковай кваліфікацыі". Такое рашэнне прынятае і ў дачыненні да адваката Таццяны Кавалевіч. Адваката Сяргея Вапручкова з Віцебшчыны камісія пазбавіла ліцэнзіі за "здзяйсненне дзеянняў, якія дыскрэдытуюць званне адваката і адвакатуру".
На днях стала вядома аб затрыманні некалькіх адвакатаў, у тым ліку Інэсы Аленскай. Яна была абаронцай палітзняволеных Сяргея Ціханоўскага, Насты Лойкі, Рыгора Кастусёва. Дзе зараз знаходзіцца Аленская, невядома. Яе збіраліся судзіць па адміністрацыйнай справе.
Ціск на адвакатаў у Беларусі пачаўся пасля выбараў 2020-га. Некалькі дзясяткаў чалавек пазбаўлены ліцэнзій па надуманых парушэннях ці "недастатковай кваліфікацыі". Некаторыя адвакаты апынуліся за кратамі. Напрыклад, Віталь Брагінец, які быў асуджаны на 8 гадоў калоніі.
