Пазняк прыехаў ва Украіну, каб "падтрымаць пазітыўныя перамены ў ПКК"
Павел Усаў і Зянон Пазняк у Нацыянальным музеі Украіны / t.me/usovpavel/
Лідар руху "Вольная Беларусь" Зянон Пазняк прыехаў ва Украіну, каб "падтрымаць пазітыўныя перамены ў ПКК, кансалідаваць рэсурсы скіраваныя на яго развіцце". Пра гэта паведаміў палітолаг Павел Усаў, які ўдзельнічае ў гэтай паездцы. Яны прывезлі дапамогу добраахвотнікам ад беларускай дыяспары. Напрыклад, беларусы з Бельгіі перадалі аўтамабіль.
Усаў піша, што ў Пазняка запланаваныя сустрэчы з беларускімі добраахвотнікамі, а таксама "іншыя важныя палітычныя сустрэчы". Адна з іх адбылася — з амбасадарам Украіны па асаблівых даручэннях па Беларусі Ігарам Кізімам. Яны абмеркавалі "пытанні ўдзелу цяперашняга ваенна-палітычнага рэжыму Беларусі ў расійскай агрэсіі супраць Украіны, шляхі кансалідацыі беларускіх дэмакратычных сіл для дэмакратызацыі Беларусі, а таксама падтрымкі беларускіх добраахвотнікаў".
Зянон Пазняк раней ужо прыязджаў ва Украіну падчас вайны, быў на фронце ў беларускіх добраахвотнікаў у Бахмуце. "У мяне нават думка была, калі б мне скінуць гадкоў 30-40, то таксама хацеў бы там паваяваць разам з імі", — гаварыў палітык.
