Пракурор просіць па 6 гадоў калоніі для Паўла Мажэйкі і Юліі Юргілевіч
Мажэйка і Юргілевіч на судзе / БЕЛТА
Па 6 гадоў пазбаўлення волі просіць пракурор для журналіста Паўла Мажэйкі і адвакаткі Юліі Юргілевіч, перадае "Белсат".
Сёння прайшлі спрэчкі бакоў. 20 ліпеня абвінавачаныя выступяць з апошнім словам.
Працэс праходзіць у Гродзенскім абласным судзе з 10 ліпеня. Судзіць іх Максім Філатаў, вядомы тым, што выносіў прысуды Вітольду Ашурку і затрыманым па "справе Аўтуховіча".
Мажэйку і Юргілевіч вінавацяць у перадачы інфармацыі "Белсату", што пракуратура называе "садзейнічаннем экстрэмісцкай дзейнасці". Гаворка ідзе пра тое, што Юргілевіч расказала Мажэйку пра прысуд палітвязню Алесю Пушкіну, якога яна абараняла, а потым — пра тое, што яе пазбавілі адвакацкай ліцэнзіі. Мажэйка, як сцвярджае абвінавачанне, перадаў гэтыя звесткі для размяшчэння на сайце "Белсата".
Як распавядала Еўрарадыё, падчас расследавання Юргілевіч і Мажэйка адмовіліся даваць паказанні. На судзе Юргілевіч заявіла, што яе трымаюць у "скоцкіх умовах" і не далі азнаёміцца са справай.
