Правакацыя рукамі беларусаў. Чакаць нападу на NATO падчас вучэнняў у 2025 годзе?

23/02/2024 - 12:22

Беларускія вайскоўцы, ілюстрацыйнае фота

Беларускія вайскоўцы, ілюстрацыйнае фота / "Ваяр"

Палітычны аглядальнік Аляксандр Фрыдман у эфіры Еўрарадыё адказаў нашым чытачам на пытанні пра “трэцюю сусветную”. Калі вам яшчэ не стала трывожна ад таго, якія тэмы наш рэдактар Зміцер Лукашук падымае ў студыі — пачытайце адказ Фрыдмана. Каб дакладна стала трывожна.

“Не дзяды, а канкрэтны дзед”

“Дзяды” вырашылі паспрабаваць NATO на зуб?” — пытаецца адзін са слухачоў Еўрарадыё. Хутчэй за ўсё, не дзяды, а канкрэтны дзед, адказвае Фрыдман.

— А другі ўсім вядомы персанаж [Аляксандр Лукашэнка — Еўрарадыё] грае тут другасную ролю. Канешне, ён дапамагае, але не вырашае гэтыя пытанні.

Фрыдман расказвае пра сцэнар, які разглядае як імаверны дацкая ваенная выведка, прагназуючы, як будуць развівацца падзеі падчас вучэнняў Расіі і Беларусі, якія могуць прайсці ў 2025 годзе.

— Яны сыходзяць з таго, што такія вучэнні сапраўды будуць, будзе канцэнтрацыя войскаў на мяжы — гэта адзін са спосабаў правакацыі.

Але яны не адказваюць на пытанне, як гэта можа выглядаць. У самым небяспечным выпадку — войскі застаюцца на мяжы, спрабуючы нерваваць палякаў, латышоў і іншыя краіны NATO. На гэтым усё скончыцца.

Магчымы, вядома, і розныя правакацыі. Напрыклад, можна парушыць паветраную прастору, можна зайсці на тэрыторыю іншай краіны — а потым выйсці. Паглядзець на тое, якой будзе рэакцыя.

А ў найгоршым выпадку, можна зрабіць гэта з дапамогай Лукашэнкі — прыкладам, паветраную прастору ў такім выпадку будзе парушаць не расійская, а беларуская авіацыя. Ці заходіць на тэрыторыю Польшчы на некалькі хвілінаў будуць беларускія, а не расійскія вайскоўцы. Альбо расійскія вайскоўцы ў беларускай форме.

Такім чынам Крэмль будзе пралічваць, на якую рэакцыю гатовае NATO. Да таго ж, звяртае ўвагу Фрыдман, мы пакуль не ведаем, хто будзе ў 2025 годзе на пасадзе прэзідэнта Злучаных Штатаў.

“Не грэбуйце чытаць вар'ятаў”

Фрыдман прапануе звярнуць увагу таксама на нядаўні допіс Дзмітрыя Мядзведзева, нягледзячы на тое, што яго не ўспрымаюць як сур’ёзнага персанажа.

— Як бы не атрымалася так, што гісторыкі будучыні будуць чытаць тэксты Мядзведзева, якога цяпер лічаць злобным клоўнам, і пытацца ў нас: вы куды глядзелі? Вы смяяліся з яго, а гэты Мядзведзеў пісаў тое, што і адбылося.

І ў гісторыі мы маем такі выпадак: у 20-я гады Гітлера разглядалі як фігуру маргінальную. Ну піша ён і піша нейкія дзікунскія рэчы. А ў 30-я гэта стала нямецкай, а потым і еўрапейская рэальнасцю.