Пры затрыманні ў Беларусі ГУБАЗіК збіў расійскага коміка: пералом пазваночніка

Пры жорсткім затрыманні ў Беларусі супрацоўнікі ГУБАЗіКа збілі расійскага коміка Арцемія Астаніна. У яго пералом пазваночніка і рэбраў. Пра гэта ў маскоўскім судзе заявіла адвакат, якая прасіла не адпраўляць падабароннага ў СІЗА.

Аднак Мяшчанскі раённы суд Масквы арыштаваў Астаніна па справе аб "распальванні нянавісці" (яму пагражае да шасці гадоў пазбаўлення волі). 

Арцемія Астаніна затрымалі ў Беларусі 17 сакавіка. Пра гэта на наступны дзень паведаміў ГУБАЗіК. У РФ на коміка пачалі крымінальную справу за жарты (пра мужчыну без ног, які "падарваўся на міне"). Пасля затрымання расіяніна перадалі ў Расію. Перад выдачай у РФ сілавікі павесілі на стэндапера мясарубку, бо Астанін жартаваў пра адзін з расійскіх рэгіёнаў, дзе маці загінулых акупантаў Украіны атрымалі ў падарунак такія машынкі.

Следчы камітэт па Маскве распаўсюдзіў відэа з выбачэннямі коміка.