Расійскі палітык: ЗША хочуць развярнуць Лукашэнку супраць Расіі

Вашынгтон мае намер альбо зрынуць кіраўніка Беларусі Аляксандра Лукашэнку, альбо паставіць яго на антырасійскія пазіцыі. Такое меркаванне ў чацвер выказаў кіраўнік камітэта Дзяржаўнай Думы Расіі па міжнародных справах Аляксей Пушкоў.

У сваім твітары расійскі палітык напісаў, што "Нуланд заявіла: ЗША адкрытыя для дыялогу з Беларуссю. Значыць, зноў збіраюцца зрынуць Лукашэнку, ці хаця б развярнуць яго супраць Масквы".

Вікторыя Нуланд — гэта памочнік дзяржсакратара ЗША. Напярэдадні яна заявіла, што ЗША і Беларусі ў апошнія гады ўдалося зрабіць маленькія крокі насустрач. Разам з тым Вашынгтон не адмаўляецца ад прэтэнзій да афіцыйнага Мінска ў праваабарончай галіне.

Фота — ria.ru