Варламаў прыйшоў на суд з мыліцай (ФОТА З СУДА)

16.40. Суддзя абвясціў перапынак да раніцы 5 лютага. Паседжанне пачнецца а 10-й гадзіне.

***

15.00. Пракурор агучвае падрабязнасці пра тое, якім чынам Варламаў нанёс страты Белдзяржуніверсітэту у памеры 88 мільёнаў рублёў.

14.15. Аднавіўся працэс.

***

12.50 Варламава вінавацяць у нявыплаце арэнды на 88 мільёнаў рублёў

Менавіта столькі Агенцтва моды Сашы Варламава не заплаціла за арэнду Ліцэю БДУ, па словах пракурора.
130204_papkouprakuror.mp3
Акрамя таго, пракурор абвінаваціў Варламава ў тым, што ён самавольна арганізаваў і праводзіў у Ліцэі БДУ платныя заняткі, перадае карэспандэнт Еўрарадыё Арцём Мартыновіч з залы суда.

Таксама Варламава вінавацяць у службовай падробцы. Нібыта, ён з карыслівым намерам уносіў заведама лжывыя звесткі ў даведкі, пададзеныя для аплаты ў бухгалтэрыю Ліцэя БДУ. Тое жсамае рабілі супрацоўнікі яго агенцтва. 

Сярод іншага пракурор абвінаваціў Варламава ў тым, што пры падрыхтоўцы фэстаў "Млын моды" ён дзейнічаў з мэтай асабістага прызнання ў модных колах, у індустрыі моды, з мэтай павышэння сваёй значнасці.

***

11.30 Варламава пакінулі пад вартай. Суддзя абгрунтавала рашэнне тым, што па стане здароўя ён можа там знаходзіцца.

***

11.10 Сашу Варламава просяць выпусціць з-пад варты

З такім хадайніцтвам выступіў адвакат падсуднага мадэльера.

Ён спасылаецца на тое, што ў яго падабароннага другая група інваліднасці.

У сваю чаргу, дзяржаўны абвінаваўца выступае супраць. Ён спасылаецца на тое, што супраць Варламава выстаўленыя сур'ёзныя абвінавачанні.

Суддзя адправілася думаць.

***

Пацярпелых набралося прыкладна паловы залы.

***

Падсуднаму мадэльеру цяжка стаяць. Суддзя дазволіла яму сядзець, калі становіцца кепска.

Пра гэта з залы суда перадае журналіст Еўрарадыё Арцём Мартыновіч.

Па яго словах, у зале знаходзіцца каля паўтара дзясятка журналістаў і прыкладна столькі ж дзяўчат мадэльнага выгляду.

Нагадаем, што вядомага мадэльера судзяць у Ленінскім судзе сталіцы. Яго вінавацяць па пяці артыкулах Крымінальнага кодэкса. Сярод іх махлярства ў асабліва буйным памеры, прыўлашчванне маёмасці, ухіленне ад уплаты падаткаў, злоўжыванне службовымі паўнамоцтвамі, крадзеж у буйным памеры.

У Следчым камітэце кажуць, што ў якасці сведак па крымінальнай справе дапытаныя больш за 800 чалавек. Пацярпелымі прызнаныя 353 асобы.

Саша Варламаў знаходзіцца за кратамі з 20 траўня 2011 года. Ён займаў пасаду дырэктара прадпрыемства "Агенцтва моды Сашы Варламава", начальніка Цэнтра маладзёжнай моды БДУ ды інш.

Фота: Еўрарадыё