У 2012 годзе Беларусь закупіла ў Швецыі ячменю амаль на 3 мільёны долараў

“Не хочуць мець з намі інтарэсы, забірайце амбасаду, у нас нуль тавараабарачэння, у нас няма там ніякага інтарэсу”, — такімі словамі Аляксандр Лукашэнка пракаментаваў закрыццё шведскай амбасады ў Мінску.

А Еўрарадыё вырашыла даведацца, ці сапраўды гэта так, і даведалася, ці ёсць агульныя інтарэсы ў эканомік Беларусі і Швецыі.

“Паводле паказчыкаў знешняга гандлю ёсць павелічэнне. Як у цэлым, так і па пазіцыях экспарту і імпарту тавараў”, — кажа прэс-сакратар “Белстата” Алена Кандраценка.

Сапраўды, экспарт беларускіх тавараў у Швецыю з 2007 па 2011 год вырас з 71 да 91 мільёна долараў, а імпарт — са 135 да 218 мільёнаў долараў.

_{* дадзеныя "Белстата"}

“Таварная структура экспарту ў Швецыі ў асноўным прадстаўлена торфам, калійнымі ўгнаеннямі. Але разам з тым пастаўляюцца як пілы, лесаматэрыялы, дрот”, — распавядае Еўрарадыё аналітык даследчай кампаніі BusinessForecast Аляксандр Муха.

Але некаторыя пазіцыі прадстаўляюць асобную цікавасць. Напрыклад, у першай палове 2012 года Беларусь закупіла ў Швецыі ячменю на 2,7 мільёна долараў, а седлавых цягачоў і трактароў — амаль на 7,5 мільёна долараў. Таксама Беларусь патраціла амаль 9 мільёнаў долараў на шведскія паравыя катлы. Агулам жа за першыя паўгода 2012 года экспарт Беларусі ў Швецыю склаў амаль 42 мільёны долараў пры імпарце ў 93,5 мільёна долараў.

Аналітык кажа, што хай сабе лічбы і не самыя вялікія, але патэнцыял для развіцця гандлю паміж краінамі ёсць.

Аляксандр Муха:“Для нас Швецыя магла б быць выгадна ў плане пашырэння экспарту на скандынаўскі рынак, у Нарвегію і Фінляндыю. А мы маглі б прадстаўляць для Швецыі пляцоўку для пашырэння прысутнасці шведскіх кампаній на рынках Мытнага саюза і сумежных дзяржаваў, той жа Украіны”.

Выканаўчы дырэктар шведска-беларускай бізнес-асацыяцыі Арнэ Элефорс не бачыць нейкіх палітычных бар’ераў для вядзення бізнесу ў Беларусі. І не спяшаецца перакладаць палітычны канфлікт паміж Мінскам і Стакгольмам у эканамічную сферу.

Арнэ Элефорс: “Спадзяюся, што будзе нейкае пазітыўнае рашэнне. І наша задача — каб рост эканамічнага супрацоўніцтва працягваўся. Мы стараемся аблегчыць гандаль паміж Швецыяй і Беларуссю. Мы чакаем, што развіццё стасункаў будзе працягвацца”.

Са шведскім экспертам пагаджаецца і Аляксандр Муха. Які лічыць, што стасункі са Швецыяй могуць выйсці на новы ўзровень, калі Беларусь стане членам СГА і вызваліцца ад некаторых мытаў.

Фота: neg-ufa.ru