Жыхарка Шаркаўшчыны амаль 3 гады судзіцца за 2 соткі зямлі
Дырэктар Глыбоцкай аўтабазы прысвоіў 9 сотак зямлі: 2 соткі ўзараў у суседкі, 7 сотак адмераў у дзяржавы.
У 2001 годзе Анфія Далецкая набыла ў пасёлку Шаркаўшчына жылы дом з участкам 18 сотак. Дом аказаўся нядрэнным, а вось з суседам ёй не пашанцавала. Паводле слоў жанчыны, яе сусед — Яўген Лысёнак, дырэктар Глыбоцкай аўтабазы — паспрабаваў перасунуць мяжу ўчастка на некалькі сотак на сваю карысць.
Тады спадарыня Далецкая разам з мужам перамерылі сваю тэрыторыю згодна з тэхнічным пашпартам участка. І высветлілася, што яны не толькі нічога не павінны суседу, але, наадварот, сусед незаконна ўзараў кавалак участку.
Фота: Яўген Лысёнак падоўжыў плот
Мірным шляхам вырашыць канфлікт не ўдалося, і тады жанчына звярнулася ў Шаркаўшчынскі райвыканкам з просьбай разгледзець зямельную спрэчку. У райвыканкаме для разгляду гэтай справы стварылі камісію, расказвае Анфія Далецкая:
"Калі прыехала камісія, то яна склала акт на маю карысць. Выявіла, што спрэчны кавалак паводле закону належыць мне, я выплачвала за яго падаткі. А Лысёнак самавольна забраў у мяне 2 соткі зямлі. Бо камісія зарэгістравала, што замест 17,9 соткі ў мяне засталося 16. Начальнік зямельна-будаўнічай службы адправіў у Віцебск акт у гіпразем для дзяржаўнай рэгістрацыі".
Аднак у Віцебску ўчастак так і не зарэгістравалі. А калі Анфія Далецкая паспрабавала даведацца, у чым прычына, ёй адказалі, што мясцовы райвыканкам змяніў рашэнне камісіі на карысць дырэктара аўтапарку, а спецыяліста з камісіі райвыканкаму, які займаўся гэтым пытаннем, звольнілі. У выніку, Анфія яшчэ засталася вінная суседу паўсоткі.
Жанчына вырашыла працягнуць змаганні ў судовым парадку. Разбіральніцтвы з Яўгенам Лысёнкам цягнуцца ўжо тры гады і за гэты час высветлілася, што дырэктар аўтапарку больш чым 30 гадоў плаціў падатак толькі з 8 сотак, а фактычна карыстаецца 17. Праўда, суд так і не змог высветліць, за кошт якіх земляў і на якой падставе ўчастак Лысёнка павялічыўся ўдвая, працягвае Далецкая:
"Суддзя запытала ў Лысёнка: чаму вы 34 гады не плацілі падаткі? Калі вы лічыце, што гэта вашая зямля, чаму яе не зарэгістравалі? Мала таго, што ў мяне 2 соткі забраў, дык у дзяржавы, незаконна прысвоіў сябе зямлю. Камісія зарэгістравала, што ён карыстаецца 17 соткамі, а ў судзе высветлілася, што валодае толькі 8 соткамі".
Тым не менш Пастаўскі раённы суд прымае бок дырэктара аўтапарку, у сваю чаргу Далецкая прайшла ўсе інстанцыі ў раёне і вобласці. Цяпер жанчына збіраецца звярнуцца ў Вярхоўны суд.
Рубрыка “Самаабарона” спецыяльна для праграмы “Кардыяграма”.
Праваабарончая праграма “Кардыяграма” выходзіць шточацвер а 17 гадзіне.
