“Рок па вакацыях”: пераасэнсаванне брэнда (фота, гук з канцэрта)
З колішняга рок-дыназаўра фэст ператварыўся ў зебру: цяжкія ZM99, ZNICH і POMIDOR/OFF чаргаваліся на сцэне з лайтовымі камандамі “для школьнікаў”.
Ідэя фэсту “па вакацыях” актуальная як ніколі. Адстаяўшы святочныя лінейкі, затрымацца яшчэ на некалькі гадзінаў у цёплых летніх успамінах ― гучыць прывабна! Але сёлетні фэст школьнікі праігнаравалі, 300 гледачоў ― не аўдыторыя для такой падзеі…
“Людзей адназначна мусіла быць больш. З музыкай усё добра. Але калі б зрабіць уваход таннейшым, было б прасцей. Мне здаецца, што 80 тысяч на ўваходзе ― такі кошт шмат каго спыняе”, ― разважае пра прычыны “дрэннага наведавання” фэсту музыка і прамоўтар Ягор Куноўскі.
ZM99 выходзяць на сцэну ў 17:30 ― дзіцячы час! На залітай сонцам сцэне Зоя Сахончык, уся ў чорным, глядзіцца дзіўнавата.
Пад J-J Bingz гледачы ажываюць. Хлопцы выдаюць вельмі прыстойны сэт, іх светлы настрой падхоплівае Step Hall… І заўсёднікі фэсту адразу пачынаюць бухцець:
“Раней гэта была падзея. Людзі вярталіся з вакацыяў і адразу ўліваліся ў нармальнае жыццё. Гэта быў пачатак усіх канцэртаў! Уаў! А сёння такое ўражанне, што пацаны з раёна сабраліся і чыста для сябе нешта тут сыгралі, парадаваліся… Няма таго маштабу”.
Каб абвяшчаць наступны гурт, Іна Кашырына пераапранаецца ў чорнае. На сцэну выходзіць ZNICH! Ад ска-настрою не застаецца і следу, гурт насычае танцпляц зусім іншым драйвам! Пад рычанне Алеся Таболіча скача тая палова гледачоў, якая дагэтуль сумавала. А тая, якой брутальны слэм не даспадобы, блукае па пляцоўцы ў пошуках піва і закусона, якія скончыліся вельмі хутка… Ну што гэта за фэст, калі з харчоў ёсць толькі бульба-фры?
Пад ZNICH над паркам Dreamland пачынае гусцець змрок, што даволі лагічна. Перад гледачамі з'яўляецца… Clover Club! Чарговы круты паварот у праграме. Добра прыгітараны, але ўсё ж сінтэтычна-клавішны indie-рок з жаночым вакалам выклікае асацыяцыі з New York Dolls і ўвогуле гучыць вельмі прыемна, але пад сцэнай адбываецца чарговая ракіроўка настрояў.
“Не хапае тут “Дай Дарогу!” ― скардзяцца хлопцы, якія толькі што шалёна слэміліся пад “Язычнік я”. ― Вось калі б яны былі, дык і людзі сабраліся б, і настрой быў бы зусім іншы! А нам хаця і падабаецца музыка, але пакуль неяк ніякавата”.
“Дай Дарогу!” сапраўды разглядаліся ў якасці ўдзельнікаў "Рок па вакацыях", але не захацелі свяціцца ў Мінску напярэдадні сольнага канцэрту і заламілі арганізатарам непад’ёмны цэннік. Што ж, без іх — так без іх.
Белая паласа, чорная паласа, белая, чорная… За “клаберамі” сваё рэзкае трыа выводзіць на сцэну Аляксандр Памідораў. На яго выступ вылучана да смешнага мала: паўгадзіны! POMIDOR/OFF не паспявае сыграць ні “Дым”, ні “Радыё”, і саступае сцэну хэдлайнерам: Akute!
“Прывітанне, Мінск!” ― вітаюцца хлопцы пад віск дзяўчат. “Здароў, Магілёў!” ― адгукаецца танцпол.
Akute сапраўды выраслі да статусу хэдлайнераў. Пакуль што яны не здольныя сабраць тысячу чалавек, але палова гледачоў дакладна прыйшла ў Dreamland на іх. Сумныя, хвалюючыя песні Akute ― гэта сапраўднае развітанне з летам і прывітанне восені, так што на “Року па вакацыях” яны былі да месца.
