“Наркакарыда” і рэкордныя цэны на каву — #ІхНоравы

Пакуль S.T.A.L.K.E.R. 2 б’е рэкорды на платформе Steam, з іншай папулярнай гульні, Hitman, прыбралі персанажа вядомага баксёра Конара Макгрэгара.

Разам з тым пакуль мы (ды і вы) сядзім на працы, у Паўднёвай Карэі 10% працоўных месцаў у прамысловым сектары ўжо занялі робаты.

Пра гэта ды іншае — у штодзённай рубрыцы Еўрарадыё "Іх норавы".

Паўднёвая Карэя стала першай краінай, дзе робаты занялі 10% працоўных месцаў у прамысловым сектары

Паўднёвая Карэя стала першай краінай у свеце, дзе робаты занялі больш за 10% працоўных месцаў у прамысловым сектары. Пра гэта напісаў Independent са спасылкай на даследаванне World Robotics.

На гэты момант у Паўднёвай Карэі налічваецца 1102 робаты на 10 тысяч работнікаў. За апошнія гады краіна стала лідарам па ўкараненні робатаў на фабрыках.

Наступныя ў спісе — Сінгапур і Кітай. Сярод еўрапейскіх краін лідарам прызналі Германію. Там больш за 400 робатаў на 10 тысяч работнікаў.

У Паўднёвай Карэі ўкараненне робатаў разглядаюць як спосаб вырашэння праблемы скарачэння працаздольнага насельніцтва з прычыны нізкай нараджальнасці.

Робаты ў краіне працуюць усюды — ад бальніц да рэстаранаў.

Прэзідэнтка Мексікі супраць “наркакарыда”

Прэзідэнтка Мексікі Клаўдыя Шэйнбаўм плануе распачаць кампанію супраць “narco corrido”. Гэта музычны жанр, які часта звязваюць з гвалтам у наркакартэлях.

Шэйнбаўм абвясціла пра намер распачаць кампанію па папулярызацыі менш гвалтоўных музычных жанраў, якія не так цесна звязаныя з гандлем наркотыкамі. Мэта кампаніі — спыніць праслаўленне гандляроў і барацьба з наркакультурай.

“Забараніць іх — не варыянт”, — сказала Шэйнбаўм. Замест гэтага прэзідэнтка прапануе канкурэнцыю з іншымі карыда-гуртамі, якія “праслаўляюць іншыя паводзіны і культурныя погляды”.

Яе сакрэтная зброя — 47-гадовы губернатар Эстэбан Вілегас, які час ад часу спявае больш традыцыйныя песні ў стылі "банда".

Эксперты перакананыя, што галоўнай прычынай росту цэн да 27-гадовага максімуму сталі навіны з Бразіліі, адной з найбуйнейшых сусветных экспарцёрак кавы. Гандляры адзначаюць, што праз неўраджай і засуху магчымы дэфіцыт кававых зерняў.

Журналісты пішуць, што, нягледзячы на ​​дастатковую колькасць запасаў у пастаўшчыкоў, вытворцы актыўна скарачаюць прапанову на рынку на выпадак, калі студзеньская справаздача Мінаграпрама Бразіліі апублікуе звесткі, ніжэйшыя за чаканы ўзровень 1,7 млн ​​мяшкоў кававых зерняў.

Аналітык Rabobank Гільерме Морыя кажа, што на патэнцыял ураджаю кавы "безумоўна паўплываў працяглы сухі і спякотны перыяд, які зменшыў пасевы кавы арабікі да верасня".

"Цяпер ёсць асцярогі, што плады кавы не паспеюць саспець, а гэта падвяргае цэлы ўраджай небяспецы таго, што можа быць дэфіцыт", — канстатуе спадар Морыя.

Адмена Конара Макгрэгара

Персанажа прафесійнага баксёра Конара Макгрэгара прыбралі з відэагульні Hitman пасля таго, як суд у Дубліне прызнаў яго вінаватым у згвалтаванні.

"Мы ставімся да гэтага пытання вельмі сур'ёзна і не можам ігнараваць яго наступствы", — так распрацоўшчыкі патлумачылі сваю адмову працягнуць супрацоўніцтва з Макгрэгарам.

Персанаж Конара Макгрэгара з’яўляецца ў гульні Hitman: World of Assassination у адной з дадатковых місій, дзе гульцу даручана яго забіць. Геймеры, якія ўжо аплацілі дадатковыя матэрыялы, змогуць праходзіць гэтую місію і далей.

22 лістапада байца змяшаных адзінаборстваў Конара Макгрэгара прызналі вінаватым у згвалтаванні ў 2018 годзе. Цяпер ён мусіць выплаціць пацярпелай 248 тысяч еўра.