Самалёт "Белавія" вярнуўся ў мінскі аэрапорт праз праблемы з рухавіком
Самалёт "Белавія", ілюстрацыйнае фота / Еўрарадыё
У Нацыянальны аэрапорт Мінск вымушана вярнуўся самалёт кампаніі "Белавія", які ляцеў у Дамадзедава (Масква, Расія). Прычынай сталі праблемы з рухавіком, паведамляе тг-канал пра авіяздарэнні AVIAINCIDENT.
Гэта пацвярджае і сэрвіс Flightradar. На ім бачна, што борт пакінуў Беларусь і зайшоў у расійскую паветраную прастору, але за Смаленскам развярнуўся і паляцеў назад.
Паведамляецца, што здарэнне адбылося ўвечары 4 снежня. Як вынікае з раскладу на сайце мінскага аэрапорта, самалёт вылецеў у 21:10, хаця першапачаткова час вылету быў прызначаны на 20:20.
Паводле інфармацыі AVIAINCIDENT, за расійскім горадам Вязьмай экіпаж заявіў аб праблеме з рухавіком і вырашыў вярнуцца на аэрадром вылету.
Пасадка ў Мінску, як адзначаецца, прайшла ў штатным рэжыме.
