Сілавікі ў Беларусі штотыдзень прыходзяць да родных каліноўца
Каліновец з пазыўным "Хіп" / zerkalo.io
Сілавікі ў Беларусі штотыдзень прыходзяць да бацькоў байца палка Каліноўскага з пазыўным "Хіп". Як піша "Зеркало", да поўнамаштабнага ўварвання Расіі ва Украіну ён быў кадравым вайскоўцам у РБ, працаваў на аэрадроме ў Мачулішчах. Пасля пачатку вайны звольніўся і з'ехаў за мяжу. На яго распачалі першую крымінальную справу — нібыта меў доступ да сакрэтных звестак і не мог пакідаць краіну.
"Штотыдзень да маіх родных прыходзяць сілавікі, нібыта шукаюць мяне, — расказвае "Хіп". — Першы раз дом бацькоў проста перавярнулі з ног на галаву, вынеслі вароты і распатрашылі ўсё. Але нічога майго там даўным-даўно няма... Падчас ператрусу сілавікі забралі ў бацькоў толькі маю старую майку".
"Хіп" уваходзіць у службу медыцынскай эвакуацыі палка. У жніўні яна знаходзілася на Харкаўшчыне, побач з беларускімі мінамётчыкамі. Добраахвотнік не меў медыцынскай адукацыі, але медыцына яму падабаецца. Сур'ёзную падрыхтоўку ён атрымаў у падраздзяленні.
