Сілавікі затрымалі падлетка, які "замініраваў" ГЗЦ "Экспабел"
ГЗЦ "Экспабел" у Мінску / Reform.by
Сілавікі затрымалі падлетка, які вырашыў пажартаваць і "замініраваў" гандлёва-забаўляльны цэнтр "Экспабел" у Мінску.
Паведамленне пра магчымае мініраванне паступіла ў міліцыю ад работнікаў цэнтра.
На месца здарэння прыехалі следчыя, якім давялося эвакуяваць наведвальнікаў "Экспабела".
Па гарачых слядах быў затрыманы 12-гадовы мінчанін, які патлумачыў, што інфармацыя пра мініраванне была ўсяго толькі жартам.
У міліцыі нагадваюць, што крымінальная адказнасць за лжэмініраванне надыходзіць з 14 гадоў і пагражае пазбаўленнем волі да 7 гадоў. У дадатак з вінаватага спаганяюцца ўсе выдаткі па рэагаванні на ілжывае паведамленне.
Калі злачынства здзяйсняе дзіця, маладзейшае за названы ўзрост, то адказнасць за яго "жарт" ускладаецца на бацькоў.
