СК: затрымалі мітынгоўцаў, якія ўзламалі камп'ютарную сістэму Мінгарвыканкама

У Мінску затрымалі двух мужчын, якія ўзламалі камп'ютарную сістэму Мінгарвыканкама, паведамляе прэс-служба Следчага камітэта.

Як заяўляе следства, 34-гадовы мінчук узламаў камп'ютарную сетку Мінгарвыканкама ўначы 3 лістапада. Сам мужчына ў гэты час знаходзіўся на тэхнічным паверсе будынка на вуліцы Прытыцкага. Міліцыянты затрымалі яго на месцы здарэння. У яго мабільніку знайшліся сведчанні, што мужчына атыўна ўдзельнічаў у мітынгах.

Неўзабаве затрымалі і яго знаёмага, які таксама меў дачыненне да хакерскага ўзлому і да ўдзелу ў масавых мерапрыемствах. Дома ў 31-гадовага мінчука адбышся ператрус. Паведамляецца, што міліцыя знайшла там агнястрэльную зброю, боепрыпасы, бронекамізэлькі, каскі, мячы, радыёстанцыі ды ўлёткі з заклікамі да страйку.

Затрыманых прызналі падазраванымі ў несанкцыянаваным доступе да камп'ютарнай інфармацыі, учыненым групай асоб паводле папярэдняй змовы (ч. 2 арт. 349 Крымінальнага кодэкса) і актыўным удзеле ў групавых дзеяннях, якія груба парушаюць грамадскі парадак (ч. 1 арт. 342).

Чаму на хакераў не пачалі крымінальную справу за захоўванне агнястрэльнай зброі, прэс-служба СК не ўдакладняе.

Дарэчы, 13 верасня міліцыя паведамляла, быццам пад Магілёвам затрымала "баявую групу" "Партызаны Магілёва". Як паказала расследаванне Еўрарадыё, хутчэй за ўсё гаворка ішла пра страйбалістаў.