Следчы камітэт затрымаў галоўнага анестэзіёлага-рэаніматолага краіны
Следчы камітэт расследуе крымінальную справу на галоўнага анестэзіёлага-рэаніматолага краіны Аляксандра Дзядзько. Пра гэта піша TUT.by са спасылкай на афіцыйнага прадстаўніка ведамства Сяргея Кабаковіча.
Яго падазраюць у атрыманні хабару ад прадстаўнікоў камерцыйных структур за вырашэнне пытанняў, якія ўваходзяць у яго кампетэнцыю. "У цяперашні час з затрыманым працуюць следчыя, праводзяцца неабходныя працэсуальныя дзеянні", — паведаміў Кабаковіч.
Паводле неафіцыйнай інфармацыі, Дзядзько затрымалі 15 траўня — нібыта ў рамках рэзананснай "справы медыкаў". Паказанні на лекара даў, магчыма, адзін з пастаўшчыкоў медыцынскага абсталявання, які фігуруе ў справах іншых медыкаў.
Аляксандр Дзядзько працуе ў медыцыне 36 гадоў. Увесну 2008 года ён разам з калегамі выканаў першую аперацыю па перасадцы печані. Дзядзько — лаўрэат Дзяржаўнай прэміі за распрацоўку і ўкараненне тэхналогій трансплантацыі органаў у дзяцей і дарослых.
