Слуцкае выданне "Інфа-Кур'ер" закрыла свой тэлеграм-канал

Слуцкае выданне "Інфа-Кур'ер" у сваім тэлеграм-канале паведаміла, што больш не будзе яго абнаўляць.

"Больш на канале і ў чаце абнаўленняў не будзе. Думаем, нейкія шматслоўныя тлумачэнні прычын будуць недарэчнымі", — пішуць слуцкія журналісты.

Рэдакцыя адзначае, што магчымасць каментаваць у чаце яны адключылі яшчэ раней.

У сваім звароце да чытачоў журналісты выдання пішуць: "Просім: калі ласка, не збівайцеся са шляху гуманізму, спагады, павагі, імкнення да міру і рэальнага інфармавання, а не прапаганды і маніпуляцый. Таму прытрымлівайцеся той дарогі, па якой ідзём мы".

Пры гэтым газета працягне выходзіць.

Як распавядала Еўрарадыё, 15 сакавіка ў рэдакцыі "Інфа-кур'ера" адбыўся ператрус. Рэдактара газеты Сяргея Станкевіча і яго намесніка Алега Рубчэню арыштавалі на 15 сутак — нібыта за "непадпарадкаванне".

Газету адмаўляліся браць у кіёскі.