Спорткрама: “Замест лыж ды сноўбордаў купляюць ровары”

Хто яшчэ выйграў ад бясснежнай зімы?

Ад прадаўца крамы “Спортцэнтр” Паўла даведваюся, што пасярод зімы самы хадавы тавар — ровары:

“Санкі — яны амаль не прадаюцца зусім. У нас сноўборды яшчэ ёсць, але яны, як і лыжы не ідуць. А вось на ровары — попыт. Некалькі разоў на тыдзень пытаюць”.

У краме “Спорттавары” пад Новы год аб’явілі зніжкі ў 15% — пакупнікі быццам бы з’явіліся, але куплялі ў асноўным падарункі. Пасля святаў продаж зноў на нулі.

Цяжка сказаць, ці прайграюць крамы спорттавараў з-за такой зімы. Адзін ровар беларускай фірмы каштуе 1,3 мільёна, лыжы з ўсімі неабходнымі прычындаламі — каля мільёна. Так што прадаваць ровары быццам бы і выгадней, хоць прадаўцы спорттавараў снегу вельмі чакаюць. Гэта павысіць продажы ў разы.

У краме футраў “Белая ліса”, што ў Мінску, распавядаюць: пакупнікоў няма нават нягледзячы на істотныя зніжкі: пры кошце шубы ад 4 да 13 мільёнаў, зніжкі да 15%.

Не надта многа пакупнікоў і ў Мазырскай краме футраў — пакупнікоў мутонавых шубак ды паўшубкаў проста няма. І, як мяркуе прадавец Жана, ўжо не будзе да сакавіка.

“Людзі разважаюць так: а колькі той зімы ўжо засталося — пахаджу і так. Людзі чакаюць зніжак — у сакавіку будуць добрыя зніжкі, вось яны і разважаюць, што лепей ўжо пачакаць ды яшчэ з растэрміноўкай на ўсё лета…”, — працягвае Жана.

Не асабліва шчасціць і ўладальнікам пракатных квадрацыклаў. Як заўважае кіраўнік фірмы Квадра-Тур Аляксандр, адсутнасць снегу моцна ўплывае на колькасць кліентаў.

3“Зніжэнне ідзе болей чым на 50%, мо працэнтаў на 70% меней, чым ў снежныя зімы. Не хочацца, каб людзі моклі пад дажджом, а потым прастудзіліся, тэхніку трэба мыць. Вельмі снежная зіма — таксама не надта добра, бо трасы трэба рыхтаваць, а гэта зноў жа выдаткі”. Найлепшыя ўмовы надвор’я для паездкі на квадрацыклах на думку Аляксандра — гэта калі не надта многа снегу і лёгкі мароз.

Не выйграе і не прайграе шынамантаж. На шынамантажы, што ў мінскім раёне Сухарава заўважаюць, што працуюць ў звычайным рэжыме — “ўсе адэкватныя людзі” ўжо пераабуліся ў зімнія шыны, а рамонт — звычайны.

А вось у ЖРЭА № 2 Фрунзенскага раёна разважаюць, што бясснежная зіма — гэта выгадна… для камунальнікаў.

“Рэжым пратаплівання ў памяшканнях, аб’ём працы меншы, а таксама даплачваць дворнікам не трэба за дадатковую прыборку снегу, бо ў снежныя зімы ў дворнікаў і заробкі большыя”, — разважаюць у ЖРЭА № 2.

Быццам бы выйгрыш для камунальнікаў навідавоку, але не для жыхароў — нягледзячы на "рэжым пратаплівання" плаціць меней за ацяпленне жылля мы не сталі: за мінулы год тарыф за гігакалорыю павялічваўся тры разы і вырас на 20%. Таму, нягледзячы на такую зіму, плаціць меней не станем.

Хто выйграў ад бясснежнай зімы, дык гэта гарналыжныя цэнтры! У Сілічах аншлаг, бо тут снег ёсць. Няхай сабе і са снегавых пушак.

“Пад Новы год раскупляліся навагоднія пакеты, у асноўным куплялі расіяне. Нягледзячы на снегавыя пушкі, яны працуюць за кошт электрычнасці і нашага тэхнічнага возера, гэта акупляецца”, — кажуць Еўрарадыё ў Сілічах.

Але тут жа дадаюць, што ў снежныя зімы наведвальнікаў ўсё роўна болей — не ўсе ведаюць пра штучны снег.