Спявачка, мастачка, танцор. Якія студэнты сядзелі побач з Лукашэнкам
20 сакавіка на сустрэчы з творчай моладдзю Аляксандр Лукашэнка падарыў адной са студэнтак чарнільную асадку. Еўрарадыё вырашыла даведацца, каму пашанцавала атрымаць такі падарунак ад кіраўніка дзяржавы, і за якія заслугі студэнты мелі гонар сядзець каля Лукашэнкі цягам амаль чатырох гадзін.
Лізавеце Запека, якая цяпер будзе карыстацца прэзідэнцкай асадкай, 19 гадоў. У сталіцу яна прыехала з Бабруйска і вучыцца ў Беларускім дзяржаўным інстытуце культуры і мастацтваў. Акрамя таго, дзяўчына ўжо працуе выкладчыцай вакалу ў музычнай школе Jam.
Запека спявала ў мюзіклах Кіма Брэйтбурга “Казанова” і “Дуброўскі”, а таксама была бэк-вакалісткай Ірыны Дарафеевай. Дзяўчына любіць гісторыю – на цэнтралізаваным тэставанні па гісторыі Беларусі Лізавета Запека набрала 100 балаў.
Нашмат менш вядома пра Валерыю Праслову, студэнтку Мінскага дзяржаўнага мастацкага каледжа імя А.К. Глебава. Год таму дзяўчына ўдзельнічала ў конкурсе КрасаWEEK 2017 – намалявала аўтапартрэт і заняла 3 месца ў намінацыі “Жывапіс”. Таксама яна ўзяла спецыяльны прыз у гэтай жа намінацыі з працай “Імгненне”.
У Еўрарадыё атрымалася адшукаць Сяргея Мікеля – напэўна, самага тытулаванага і таленавітага юнака з тых, якія апынуліся побач з Лукашэнкам.
У 2012-ым Сяргей стаў студэнтам Беларускай дзяржаўнай акадэміі музыкі на курсе Валянціна Елізар'ева. Ужо ў 2013 годзе ён стаў выкладаць сучасныя танцы – у мінскім каледжы мастацтваў і ў студыі Smart Dance. За яго плячыма не адзін гран-пры, а ў 2016 годзе Сяргей правёў у БДАМ аўтарскі вечар сучаснай харэаграфіі “Анатомія танца”.
У сваёй біяграфіі на сайце smartdance.by хлопец пазначыў, што у 2016 годзе стаў стыпендыятам Спецыяльнага фонду прэзідэнта па падтрымцы адоранай моладзі, але Еўрарадыё не знайшло яго ў афіцыйных спісах.
