Стала вядома, колькі беларусы атрымаюць за "золата" Еўрапейскіх гульняў

Беларускія пераможцы Еўрапейскіх гульняў атрымаюць 10 200 рублёў, або каля 5000 долараў, паведамляе tribuna.com. Уладальнікам срэбраных узнагародаў выплацяць 6375 рублёў (каля 3000 долараў), бронзавых — 4080 рублёў (каля 2000 долараў).

За рэкорды прадугледжваюцца дадатковыя выплаты. Сусветны рэкорд прынясе беларускаму спартоўцу 6375 рублёў (прыкладна 3 тысячы долараў), еўрапейскі — 3825 рублёў (1900 долараў), нацыянальны — 370 долараў.

На іншых міжнародных спаборніцтвах беларускія спартоўцы маглі атрымаць значна большыя грашовыя ўзнагароды. Напрыклад, на Алімпійскіх гульнях 2016 года ў Рыа за залаты медаль выплачвалі 150 тысяч долараў, за срэбраны — 75 тысяч, за бронзавы — 50 тысяч.