Старшыня Еўрапарламента назваў дзеянні ўладаў Беларусі ганьбай
Старшыня Еўрапарламента Давід Сасолі назваў дзеянні ўладаў Беларусі ганьбай. Такая заява прагучала падчас яго візіту ў Эстонію (раней ён наведаў Літву і Латвію).
"Бяспека Эстоніі, Латвіі і Літвы з'яўляецца Еўрапейскім прыярытэтам, — цытуе словы Сасолі ТАСС. — Нам неабходна ўзмацніць кантроль на нашых еўрапейскіх межах, ад якіх залежыць бяспека ўсіх грамадзян Еўрасаюза".
Далей старшыня Еўрапарламента згадаў нашу краіну. "Мы бачым, што ідзе свайго роду гібрыдная вайна — Беларусь спрабуе выкарыстаць мігрантаў у сваіх інтарэсах, — гаварыў ён. — Гэта ганьба, і мы не можам дапусціць, каб гэта працягвалася... Мы не можам пакідаць гэтую лінію адкрытай для дзеянняў Аляксандра Лукашэнкі".
Давід Сасолі выказаўся за тое, каб пашыраць санкцыі супраць уладаў Беларусі.
У пятніцу канцлер Германіі Ангела Меркель на прэс-канферэнцыі з Уладзімірам Пуціным у Маскве асудзіла дзеянні ўладаў Беларусі, якія выкарыстоўваюць мігрантаў у якасці "гібрыднай зброі". На відэа — яе ранейшая заява.
