Статыстыку па беспрацоўі за другі квартал Белстат апублікуе... пасля выбараў

У другім квартале 2020 года эканоміка Беларусі пакутавала ад наступстваў пандэміі каранавіруса. У глыбокім крызісе апынуўся сектар паслуг. Турыстычны і рэстаранны бізнесы паведамлялі пра вялікае падзенне выручкі, што не магло не адбіцца на колькасці занятых у гэтых сферах.

Улады марудзілі з дапамогай прыватнаму бізнесу да канца красавіка. Прынятыя захады прадстаўнікі бізнес-супольнасці лічаць недастатковымі. разам з тым, Аляксандр Лукашэнка адкрытым тэкстам забараніў прадпрымальнікам звальняць людзей: 

 — Перадайце прыватнікам, каб гэта ўсе пачулі: калі толькі хоць адна кампанія выкіне на вуліцу людзей (у дзяржаўных гэта немагчыма, таму што мы гэта кантралюем), але хоць адна прыватная кампанія, дробная або вялікая, выкіне на вуліцу, звольніць цяпер людзей, яна наўрад ці далей будзе існаваць у Беларусі, — заявіў ён у канцы сакавіка.