Суд Маладзечанскага раёна не задаволіў іск бацькі загінулай школьніцы
Суд Маладзечанскага раёна не задаволіў іск бацькі Вікторыі Папчэні, загінулай на ўборцы бульбы. Пра гэта Еўрарадыё паведаміў Андрэй Стрыжак, інспектар незалежнага прафсаюза РЭП, які прадстаўляе ў судзе інтарэсы Алега Папчэні — бацькі дзяўчынкі.
Алег Папчэня падаў грамадзянскі іск да СВК "Усход-Агра". Ён прасіў усталяваць факт працоўных адносін паміж яго дачкой і арганізацыяй. У гэтым выпадку Дэпартамент дзяржінспекцыі па працы быў бы абавязаны правесці спецрасследаванне трагедыі як няшчаснага выпадку на вытворчасці.
Падчас судовага разгляду выявілася, што спецрасследаванне гэтага здарэння можа правесці і аддзел адукацыі Маладзечанскага райвыканкама. Калі суд запытаў, чыёй дапамогай хацеў бы скарыстацца Алег Папчэня, ён сказаў, што для яго не мае розніцы: "Не ведаю, у каго якія паўнамоцтвы і хто як праводзіць праверку. Хацелася б, каб і Дэпартамент інспекцыі працы, і аддзел адукацыі праводзілі расследаванне. Будзе добра параўнаць вынікі", — цытуе бацьку TUT.by.
Дарэчы, упраўленне адукацыі па Мінскай вобласці праводзіла ўжо ўласную службовую праверку інцыдэнту. Праверка прыйшла да высновы, што паміж школьніцай і калгасам былі працоўныя адносіны. Аддзелу адукацыі ў Маладзечне рэкамендавалі звярнуцца па расследаванне няшчаснага выпадку ў інспекцыю па працы.
Нагадаем, васьмікласніца маладзечанскай школы №11 Вікторыя Папчэня загінула 29 верасня падчас уборкі бульбы. Крымінальная справа пачатая на кіроўцу грузавіка, а таксама на двух педагогаў, якія суправаджалі школьнікаў. Паколькі дзяўчынцы было толькі 13 гадоў, то дэпартамент па працы не хацеў прызнаваць наяўнасць працоўных адносінаў паміж Вікторыяй і СВК "Усход-Агра".
