Супервакцына ад каранавіруса і голыя вяселлі ў Італіі — #ІхНоравы

06/05/2024 - 16:07

Замежныя навіны / @rubanau_collage

Французы спяклі самы доўгі багет у свеце, пабіўшы італьянскі рэкорд 2019 года. Італьянскія ўлады вырашылі здзівіць свет па-новаму і дазволілі праводзіць голыя вяселлі на адным з пляжаў Сардзініі.

Пакуль рэгіён рыхтуецца да наплыву турыстаў, навукоўцы распрацоўваюць вакцыну, якая зможа ўберагчы людзей ад усіх штамаў каранавіруса адразу. Больш падрабязна пра гэта і не толькі чытайце ў нашай пастаяннай рубрыцы "Іх норавы".

Самы вялізны багет у свеце

Французскія пекары атрымалі перамогу над канкурэнтамі з Італіі, якія стварылі ў 2019 годзе багет даўжынёй амаль 133 метры.

Яны пачалі замешваць цеста каля трох гадзін ночы, затым рупліва надавалі яму патрэбную форму і выпякалі. Прыкладна праз 13 гадзін зацятай працы багет быў гатовы.

— Сусветны рэкорд на самы доўгі багет пабіты, — заявілі ў сацсетках муніцыпалітэта Сюрэн у заходнім прыгарадзе Парыжа. — Багет, зроблены сёння ў Сюрэне, мае памер 140,53 метра!!!!

Супервакцина от коронавируса и голые свадьбы в Италии — #ИхНравы

122-метровы багет, выпечаны на выставе Milan Expo ў 2015 годзе / Antonio Calanni/AP

Рэкордны багет спяклі ў адпаведнасці з усімі правіламі вытворчасці — адзінымі інгрэдыентамі сталі пшанічная мука, вада, дрожджы і соль.

Як толькі сусветны рэкорд зафіксавалі, багет парэзалі на часткі, каб раздаць мясцовым жыхарам. Французы лічаць свой рэкорд заканамерным: кожную секунду ў краіне прадаецца каля 320 багетаў.

Голыя вяселлі на Сардзініі

— Галізна не мае нічога агульнага з сексам. Для нудыстаў — гэта філасофія жыцця, звязаная з прыродай, — кажа мэр Сан-Вера-Міліса на Сардзініі Луіджы Тэдэскі. Пасля ліста нямецкай пары, якая захацела ажаніцца на адным з нудысцкіх пляжаў горада, мясцовыя ўлады легалізавалі падобныя цырымоніі.

Хоць шмат каму гэтае пытанне здалося вартым смеху, Тэдэскі сказаў, што ў ім ёсць больш глыбокі сэнс, а таксама ідэя развіваць турызм.

— Калі ў кагосьці ўзнікнуць праблемы, ён можа прайсці міма або паглядзець на мора, — кажа мэр. — Думаю, мы жывем у цяжкі перыяд для асабістых свабодаў праз рост папулярнасці нацыяналістычных рухаў у Еўропе. Людзей, якія пратэстуюць, затрымлівае паліцыя або запалохвае. Мы павінны зрабіць усё, каб паказаць, што людзі свабодныя. Большасць людзей хочуць свабоды, а не рэжыму.

Маляўнічы пляж Іс Бенас з залацістым пяском, выдмамі і хваёвым лесам прызнаны афіцыйным месцам для нудыстаў. Яго цэнтральная частка акружаная двума звычайнымі пляжамі і часткова схаваная.

Вакцына адразу ад усіх штамаў каранавіруса

Навукоўцы стварылі вакцыну, якая патэнцыйна можа абараніць ад шырокага спектру каранавіруса, уключаючы разнавіднасці, пра якія яшчэ нават невядома. Эксперыментальную прышчэпку ўжо выпрабавалі на мышах.