Супраць Трампа выставілі абвінавачванне па справе аб засакрэчаных дакументах

Супраць былога прэзідэнта ЗША Дональда Трампа афіцыйна выстаўлена абвінавачванне па крымінальнай справе аб засакрэчаных дакументах, якія знайшлі ў яго рэзідэнцыі ў жніўні 2022-га. 13 чэрвеня ён мусіць з'явіцца ў будынак федэральнага суда ў Маямі. Тады і стануць вядомыя артыкулы, па якіх абвінавачваецца Трамп. Яму вызначаць і меру стрымання.

Па даных The New York Times, у абвінавачванні сем эпізодаў. Сярод іх — хлусня пад прысягай і змова з мэтай перашкодзіць правасуддзю.

Дональд Трамп заявіў, што не адчувае за сабой ніякай віны, а яго пераследуюць па палітычных матывах.

У красавіку 2023-га Трампа ўжо абвінавацілі ў фальсіфікацыі бізнес-справаздачнасці. Чакаецца, што суд па гэтай справе пачнецца ў наступным годзе. 

Дональд Трамп быў прэзідэнтам ЗША ў 2017-2021 гадах і мае намер зноў пазмагацца за прэзідэнцкую пасаду. Эксперты ў галіне права мяркуюць, што цяперашнія абвінавачванні не змогуць абмежаваць яго магчымасці па ўдзелу ў перадвыбарнай гонцы.