Сёння вырашыцца пытанне аб высылцы з Беларусі праваабаронцы Танкачовай
Яна з'яўляецца грамадзянкай Расіі, але пражыла ў нашай краіне каля 30 гадоў. У Беларусі нарадзілася і жыве яе дачка.
Апоўдні ў РУУС Першамайскага раёна Мінска адбудзецца паседжанне, на якім будзе разгледжаная справа старшыні праўлення Цэнтра прававой трансфармацыі Алены Танкачовай. У кастрычніку стала вядома, што ёй, як грамадзянцы Расіі, анулявалі від на жыхарства ў Беларусі. Прычынай назвалі адміністрацыйныя правапарушэнні — перавышэнні хуткаснага рэжыму падчас кіравання аўтамабілем. Цяпер міліцыя будзе вырашаць пытанне аб высылцы з краіны праваабаронцы, адзначае РІА "Новости".
Нагадаем, нядаўна Савет пры прэзідэнце Расіі па развіцці грамадзянскай супольнасці і правах чалавека папрасіў расійскі МЗС аказаць тэрміновую дапамогу Алене Танкачовай. Савет перакананы, што рэальным матывам высылкі расійскай грамадзянкі з'яўляецца яе праваабарончая дзейнасць.
Чым магла перашкодзіць уладам праваабаронца Алена Танкачова?
Фота — dw.de
