Трамп і Пуцін паразмаўлялі па тэлефоне пра Сірыю і “Ісламскую дзяржаву”
Прэзідэнт ЗША Дональд Трамп і яго расійскі калега Уладзімір Пуцін у суботу, 28 студзеня правялі першую тэлефонную размову з моманту ўступлення Трампа на пасаду кіраўніка краіны. Як паведамляе ВВС са спасылкай на прэс-службу Белага дома, размова была прысвечаная сумеснай барацьбе з тэрарыстычнай групоўкай “Ісламская дзяржава” і ўрэгуляванню канфлікту ў Сірыі.
Размова доўжылася каля гадзіны. Пуцін павіншаваў Трампа з уступленнем на пасаду. У Белым доме адзначылі, што гэты кантакт стаў важным крокам у паляпшэнні адносінаў паміж дзвюма краінамі.
Апроч праблемы тэрарызму, абмяркоўвалася таксама перспектыва аднаўлення двухбаковых гандлёва-эканамічных сувязяў і сітуацыя ва Украіне.
У суботу ўвечары таксама стала вядома, што Трамп падпісаў указ, які патрабуе ад Аб’яднанага камітэта начальнікаў штабоў падаць яму цягам 30 дзён план поўнага разгрому ІД.
Перад размовай з Пуціным амерыканскі прэзідэнт стэлефаноўваўся з канцлерам Нямеччыны Ангелай Меркель. Усяго ў суботу ён правёў перамовы з пяццю сусветнымі лідарамі.
