“Твітар” часова абмяжуе колькасць пастоў, якія можна прачытаць
Упс! Больш ніякага скролінгу / pixabay
Twitter часова ўводзіць абмежаванні на колькасць твітаў, якія карыстачы могуць прачытаць у дзень, піша BBC.
Карыстальнікі без сіняй галачкі змогуць чытаць не больш 1000 пастоў у дзень. А новыя карыстальнікі без сіняй галачкі — да 500 пастоў у дзень. Калі галачка ў вас ёсць, цешцеся: вам даступныя да 10 тыс. пастоў у дзень.
Паводле слоў Ілана Маска, мера ўводзіцца для змагання з “экстрэмальным роўнем” збору дадзеных і маніпуляцый сістэмай. Што менавіта мелася на ўвазе, Маск не вытлумачыў.
Карыстальнікі былі незадаволены гэтай мерай. Праз некалькі гадзін пасля аб'яўлення пра абмежаванні Маск паджартаваў:
“Ты выходзіш з трансу і адкладаеш тэлефон, каб прабавіць час з сям'ёй і сябрамі”, — напісаў ён.
you awake from a deep trance,
— Elon Musk (@elonmusk) July 2, 2023
step away from the phone
to see your friends & family
Зрэшты, некаторыя карыстачы ўбачылі за гэтым крокам больш, чым чыстае жаданне Маска паклапаціцца пра іх сацыяльнае жыццё. Некаторыя выказалі здагадку, што такім чынам Маск падштурхоўвае іх купіць “сінюю галачку”. А некаторыя лічаць, што ў будучыні Маск захоча спаганяць з іх плату за магчымасць прачытваць бясконцы лік паведамленняў.
Эксперт з BCS, брытанскай арганізацыі, што даследуе інфармацыйныя тэхналогіі, Адам Лявон Сміт назваў гэты крок “дзіўным” і звярнуў увагу, што такія абмежаванні паўплываюць на прыбыткі ад рэкламы.
