Як паведамляла Еўрарадыё, урад прыняў пастанову аб часовай забароне вывозіць некаторыя медыцынскія тавары 17 сакавіка 2020-га. Гэта — хірургічныя халаты, рэспіратары, аднаразовыя камбінезоны і касцюмы хімабароны, вата, бінты, маскі, марля, бахілы, камплекты адзення для медыкаў, медыцынскія пальчаткі, дыхальнае абсталяванне. Забарона была ўведзена да 1 чэрвеня. Яна па-ранейшаму не распаўсюджваецца на тавары, якія вывозяцца за мяжу для аказання гуманітарнай дапамогі замежным дзяржавам, ці пры вывазе фізічнымі асобамі, але выключна для асабістага карыстання. Яшчэ ў красавіку быў забаронены вываз з Беларусі апаратуры для штучнага дыхання.
Цікава, што ў пачатку траўня стала вядома, што "Беллегпрам" плануе прадаць у Германію мільён ахоўных масак. Пробная партыя рыхтавалася і ў Расію. Вытворцы чакалі толькі адмены забароны на экспарт масак, чаго пакуль не адбылося. Пачаць прадаваць маскі за мяжу неаднаразова прапаноўваў Аляксандр Лукашэнка.
