У Беларусі праходзяць "выбары" прэзідэнта, незалежных кандыдатаў на іх няма

26 студзеня — асноўны дзень галасавання на "выбарах" прэзідэнта. Участкі будуць адкрыты да 20:00.

У бюлетэнь унесены пяць кандыдатаў:

• Аляксандр Лукашэнка
• Ганна Канапацкая
• Аляксандр Хіжняк
• Сяргей Сыранкоў
• Алег Гайдукевіч

Ніякіх апазіцыйных кандыдатаў на гэтых "выбарах" няма, бо перадвыбарчая кампанія, як і ўсе апошнія 5 гадоў, суправаджалася ў Беларусі масавымі рэпрэсіямі і стварэннем атмасферы страху з боку ўладаў і прапаганды.

Гісторыя выбараў у Беларусі

Заходнія краіны і міжнародныя арганізацыі не прызнавалі вынікі прэзідэнцкіх выбараў у Беларусі пасля 1994 года. Усе яны, паводле заходніх назіральнікаў, СМІ і праваабаронцаў, былі несвабоднымі і суправаджаліся масавымі фальсіфікацыямі на карысць Лукашэнкі.

На выбарах 2020 года, паводле дадзеных платформы "Голас" і апытанняў Chatham House, Аляксандр Лукашэнка, відавочна, прайграў незалежнай кандыдатцы Святлане Ціханоўскай. Пасля хвалі пратэстаў па ўсёй краіне пачаліся масавыя затрыманні і судовы пераслед незадаволеных уладай. Па дадзеных на студзень 2025 года ў Беларусі больш за 1,2 тысячы палітвязняў.